 |
Questa pagina è stata trascritta, formattata e riletta. | |
| L'UOMO DI MONDO | 197 |
Ludro. Cossa?
Momolo. Son senza bezzi.
Ludro. Mal. Come me dareu i mi trenta zecchini?
Momolo. Questi xe el manco. Me despiase che gh’ho do impegni, da do bande: con quei foresti; e con una zovene, che la voggio far ballarina.
Ludro. E senza bezzi l’orbo no canta.
Momolo. Te basta l’anemo de trovarme mille ducati?
Ludro. Perchè no? Su cossa voleu che li trova?
Momolo. Son un galantomo. Gh’ho dei capitali; no so bon per mile ducati?
Ludro. Li voressi sul fià.a
Momolo. A uso de piazza, per un anno; farò una cambial, se occorre.
Ludro. Me inzegnerò de trovarli.
Momolo. Ve darò el vostro sbruffob.
Ludro. Me maraveggio; co i amici lo fazzo senza interesse. Me basta che me de i trenta zecchini della piezaria.
Momolo. Siben, e li darò.
Ludro. Vado subito a trovar un amigo.
Momolo. Ma che no ghe sia brovac.
Ludro. Lasse far a mi. (Sta volta ghe dago una magnada co i fiocchi). (da sè)
SCENA VII.
Momolo, poi Brighella.
Momolo. Fin che son zovene, me la voggio goder. Da qua un per de anni, fursi fursi me mariderò. E co me mando, butto da banda la cortesanaria, e scomenzo a laorar sul sodo.
Brighella. Sior Momolo, cossa vol dir che no l’avemo più visto? Quella signora m’ha domandà de elo tre o quattro volte.
