 |
Questa pagina è stata trascritta, formattata e riletta. | |
| L'UOMO DI MONDO | 185 |
sè in bone man. Sior Momolo, ghe son servitor, ghe raccomando mia sorela, che la ghe fazza compagnia, fin che torno. Con altri no la lasseria; ma co sior Momolo, se gh’avesse diese sorele, ghe le consegneria. (parte)
SCENA XVI.
Smeraldina e Momolo.
Smeraldina. (I ducati gh’ha sta bella virtù). (da sè)
Momolo. Diseme, siora. Quanto xe che no vedè sior Lucindo?
Smeraldina. Mi sior Lucindo? No so gnanca che el sia a sto mondo.
Momolo. Me posso1 fidar?
Smeraldina. Oh, la pol star co i so occhi serai.
Momolo. Me xe sta dito, che el ghe vien da vu.
Smeraldina. Male lengue, sior Momolo; no xe vero gnente.
Momolo. Se ve disesse mo, che me l’ha dito vostro fradelo?
Smeraldina. (Oh che baron!) Come lo porlo dir? Se el dise sta cossa el xe un busiaroa; che el vegna sto galiotto, che el me sentirà; proprio da la rabia me vien da pianzerb.
Momolo. Via, no sarà vero. No stè a fiffarc; savè che ve voggio ben, e quel che ve digo, ve lo digo per ben. Mi da vu no voi gnente altro che bona amicizia e schiettezza de cuor.
Smeraldina. In materia de sincerità, ghe ne troverè poche putte sincere co fa mi.
Momolo. Se ve vien occasion de maridarve, mi ve mariderò; ma con uno che gh’abbia da mantegnirve; no con zente che ve fazza morir dalla fame.
Smeraldina. Certo che se posso cavarme da ste miserie, lo farò volentiera. E in specie per causa de mio fradelo, che nol voi far gnente; e el vol che lo mantegna mi.
- ↑ Zatta: possio.
