2190El vegn tiels ses, domonda de magliar,
La mumma mira, sa ca tgei tertgar.
La veglia pren giud il pane in paun,
Mo quel cul pegn fa dar tuts pauns giun plaun.
El maglia tuts e lai vanzar zun nuot, 2195E giun tschaler el passa tier la buot,
E beiba ton, ch’ei pauc lien pli vonza —
La mumma dat ad el la declaronza,
Ch’in magliadrun aschi’ ed aunc bueder,
Ei detti ni el niev ni el temps veder. —
2200Perquei ord casa va il fegl, vilaus;
E sin la pezza eis el caminaus
La possa sereghegli’ en el pussent
E metta sia gnarv’en moviment.
El tema nuot las spundas de lavinas, 2205Vulend satieuer oz las selvischinas;
El auda co ils lufts ded alp sescognan,
El va leu nua ch’ils camutschs remognan.
Sil fil de las montognas il gigant
S’avonza cun in pass stendiu pressant. 2210En in valla el ha lu suatiu
In tschuppel capricorns e quels sturniu.
Cul buordi grev tuorn’el ord la montogna
A sia mumma fa el quel a mogna,
Bettend la carga en dagl esch cuschina: 2215„Prendei cheu quella carn de selvischina
Per quei tec paun e vin, ch’jeu hai retschiert —
Jeu fetschel da bugen negin entiert!“
Per esser malvesius en casa sia,
Il fegl digl uors pren suta peis la via, 2220E va egl jester per mussar fermezia
En caussas, che ad auters fan spir sguezia. —
In pur pladescha quel per siu fumegl:
El drov’in ferm sil funds ed en nuegl.
E tgei pagaglia ha quei ferm voliu? — 2225El ha dal pur lubientscha pretendiu
D’astgar smanar sin el mo ina frida. —
Mo al patrun la ricla ei vegnida,
