Vergaus quei temps, igl uors va o in di 2155Cul pign vitier in pegn e di agli:
„Emprova de trer o quei best, sch’ ti pos!“
Mo quei va buc. Igl uors tuorn’anavos
En tauna schend: „Sai tei aunc buc zavrar.
La forza enzacu ti stos mussar.“
2160Igl uors danovamein lai ir tschun onns,
Il mat ei daventaus pli ferms e gronds.
El ha merveglias de mitschar ord taunas,
El va entuorn ad encurrend puaunas,
El teidla sin ils cloms dils animals 2165E mir’encunter tschiel sils nibels bials.
Igl uors pertgira bein siu bien scolar,
E di ad el in di, ded empruar
Danovamein la giuvna forza sia:
Mo ferm el tratsch il pegn ei tuttavia, 2170Il giuven adumbatten trai pil best
E mira sin igl uors cun egl tut trest.
Igl uors marmugna culla vusch profunda:
„Miu buob, ti has aunc buc tetau avunda.“
E vinavon tschun onns il mat dagl iver 2175Dell’uorsa sto en quella tauna viver.
Carschius dal tut, robusts ei daventaus
Il giuven rés, selvadis e stampaus,
Cun spatlas ladas e pussenta bratscha
Cun ina bèra nera sur la fatscha.
2180Il fegl digl uors embratscha uss il pegn,
E fetga pei e dat si ferm in sgrégn:
„Ho, hub!“ Ei dat el tratsch in scarp sgarscheivel,
E sia possa muoss’igl um snueivel —
Si ord la crappa cun ragisch e tut 2185El trai il pegn cun gibel resolut.
Igl uors de quei cuntents po selegrar:
„A casa tia, sas ti uss turnar!“
Il giuven tschaff’il pegn cun sia braunca
E va en direcziun de la vischnaunca.
