Las poppas per purificar
Da puorlas ston ins bein spatlar;
Er’il tschariesch pass’en funcziun
1360Per dar la fina perfecziun.
La resta vegn sil ruccadi
Filada lu empau a di;
Maseinas fatgas fan ins quer,
In fil pli cret per obtener.
1365Aunc ditg ei va tier ils lenzeuls,
Cun roda vegn ei fatg si speuls.
Il rom d’urgir vegn preparaus,
Ed il cundrez bein meditaus.
Sin conta bratscha dei vegnir
1370La teila, fan ins cun urgir.
Vègn speuls el begl ein uss semptgai
Culs fils en retscha preparai.
La spada tras vègn rusnas lai
Passar il fil ch’il rom retrai;
1375La tscharna fan ins cun adatg:
Urgir bein porta gl’avantatg!
Ei vegn dal rom priu giu gl’urgiu
E cun in latsch segir teniu —
E vid il petgen nuau tier
1380Cun maun versau empau lingier.
Mintga purtada ha vegn fils,
Che vegnan uss tier novs asils
Sil bi tallè ch’ei preparaus,
Cul sughel el cantun fermaus.
1385Sco si per l’orgla gl’orgalest,
Stat la tissunza cun siu best
Vi tiel talle, avon ils glietschs
E dat cun peis e mauns ils squetschs.
Las retschas fils entras il pass
1390Van si egl ault e van a bass,
La tschefla sgola denteren,
En vi enneu cul fil tratg en.
