Curclada ei alp e prada dal clar vestgiu de neiv, 545Strusch varga si ed ora sper via ina seif.
Negliu els quolms ins auda il ramurar d’uals,
Gl’unviern tegn en cadeinas quels en profundas valls.
En in profund silenzi ruauss’il mund alpin
E mo da lunsch ins auda sin via in stgellin. 550Las pezzas e montognas terlischan sco cristagls,
Entuorn il munt sogn Gieri ils corvs fan lur termagls.
La Gada premurada va giu tiels survients
E fa en tgaminada il plan enconischents:
Cun praulas popularas ils spus de divertir, 555De far empau vacanza cun raquintar e rir.
Fumegls e fumitgasas sesentan fetg undrai
Ded ir en compagnia a vitg culs aultschentai.
E la patruna Gada disquora cun mintgin,
Tgei prender per materia e co menar ô fin.
560E suenter in’uriala per far recreaziun
Bugen serimn’il pievel, entscheiva la sesiun.
Il castellan presenta fumeglia al barun,
Fagend sur las persunas enqual’explicaziun.
Il brav portier e fravi Romeias, grischs e vegls, 565Compar’en biala stiva sco cau de tschels fumegls.
Strapazs e liungs viadis fan ir el giudavon,
Siu bratsch ha strusch pli possa de dar cul marti grond.
Mo clara ei l’egliada, siu maun ha aunc inschin,
Ed entschallir las lontschas, quei sa el sco buc in. 570Bugen en compagnia el sesa sin in baun,
Raquenta dallas tiaras, dal grond e bi Milaun. —
Il vegl ha caultschas quortas, gasacca de ponn brin
E fa per reverenza al barunet enclin.
Il Martinut entrescha, dil segner catschadur. 575El ha schuviala lada e bratscha de vigur,
Cavels de colur nera, che vegnan giu el frunt
E barba empau scarplida giudem il baditschun.
De teila grossa verda ei siu solid vestgiu
E de curom la tschenta el ha entuorn strenschiu. 580Ventrels zugliai en ghettas la forza lain sminar,
Ch’il catschadur de vaglia sils quolms sa bein duvrar.
