 |
Questa pagina è ancora da trascrivere o è incompleta. | |
Tgi stat leu en arma spel Glogn che tschalatta,
10Pinaus de sdrappar il siu paun dal dargun?
Da sfracs e da fridas la grepa rebatta,
La blocca s’ empluna sper l’ au’ a mantun.
Las auas che sbuolan en presch’ e furtina
Cun crestas spimontas nuot datg’ il luvrer:
15„Fui, fui disgraziau, il dargun tei ruina,
La bov’ ei allerta leusi el multer!“
La bova! Fugi! Cun boscagli’ e carpuna
Sezuola la massa snueivla a vall;
Il flum serebalza, la riva sbaluna,
20Tschaffaus dallas auas ei gl’ um sper gl’ ual.
Ei tucca de stuornas. Il pievel snuescha
Vesend leu el flum il combat de sgarschur:
„O Jesus, Maria, el sfundra, svanescha,
Spindrei, o spindrei il pupratsch da malur!“
25Cheu pass’ ord la fuola cun fatscha detscharta
Il cau de Lumnezia, dil Glogn il mistral,
Pil bien dil vischin el sedrova e sparta
Cun fermas manadas il tribel ual.
Gia tschaffa siu maun dallas auas l’ unfrenda,
30La riv’ ei maneivla e ferms ei siu bratsch;
Mo’ l flum sia preda cun furia defenda
El sfundra e siar’ omisdus en siu latsch. —
Ils zenns han calau de plirar ella runda,
Mo d’ in aunc rebatta la grepa il schem,
35Il zenn de s. Gliezi ch’ al pei della spunda
Lamenta sul flum in dolent requiem. —
