 |
Questa pagina è ancora da trascrivere o è incompleta. | |
Stad.
Las steilas van, han fatg il tur,
Lodol’ ei gia d’ urial’ a strada
E giu dals quolms en terlischur
Descend’ il di en la vallada.
5 E dal clutger el clar solegl
La schualm’ il di naschent salida,
’Gl aviul luvrer levaus mervegl
Sin pastgs e flurs secumblida.
Suls feins brini en terlischar
10Resplenda clar della rugada,
Ils grauns ti audas murmurar
Schebein la farcla sei pinada.
Sitgurs da vagli’ han baul d’ agur
Sil frust bi neidi sper la via.
15Las faultschs caminan tur a tur
Cantond tra’ l fein lur melodia.
Bufatg il zenn suls ers medi
Lai resunar siu tun migeivel
Dal prau sesaulz’ el clar miezdi
20Nies laud al Segner buntadeivel.
Atun.
Holla! Jeu vegnel cun gronda cargada
Miu schierl ei cun tuttas uisas tgiemblaus,
Jeu mundel e spluntel tier mintga casada
Da purs e signurs beinvegnius e salvaus.
5 Culs fretgs de nies tratsch, de fritgeivla pumera
Empleinel las crunas, truaisch ed arcun,
Al pur silla schliusa mignuccas e stera
E tier la truflad’ in per bottas tschagrun.
Stun mal sche jeu dun era stent’ e molesta
10E sundel a tuts forsa buca d’ engrau:
Pustretschs e tagliunas de piarder la testa,
Denton mia glieut, po rumpei buc il tgau!
Persuenter jeu port’ enqual flur sentardada,
Bials dis plein sulegl della stad S. Martin,
15Doreschel gl’ uaul, dun colur la vallada
E tratgel de ver vilentau zun negin.
Denton Dieus pertgiri! La schualm’ a bunura
Bandun’ il clutger da brentin’ enzugliaus;
Jeu mon culs utschals per untgir la malura,
20Avon che ’gl unviern vegn cun neiv e cuflaus. —
