 |
Questa pagina è ancora da trascrivere o è incompleta. | |
Has buca mumma pli.
(Nach Igl Ischi, S. 126, 1900.)
Sun sin fignastra tut persuls
E mirel or egl stgir;
Cheu vesel jeu vi tiel vischin
Aunc ina glisch sclarir.
5 Leu sper la tgin’ en oraziun
Ves jeu la mumma sta;
Agl affont sin frunt e pèz,
La crusch ell’ ussa fa.
Igl aunghel porscha siu maunet
10Per dar carin comiau;
La mumma spert aunc dat in betsch,
E lu vegn tut stezau.
Leu sin santeri va miu egl,
Entscheiva a bargi.
15„Ah sventirau, rebatt’ il cor,
„Has buca mumma pli.“
La lavina.
(Nach Igl Ischi, S. 128, 1900.)
Vid il péz encadanada
La lavina tut dascus
Schem’ e plira e suspira
Già da ditg suent’ il spus.
5 E pren mira, neu d’ Italia
Vegn cun forza il favugn;
Ils utschals ein sia suita
Ed in matg ha’ l enta pugn.
Ault ord l’ aria, el uss catta,
10Vid la spunda, ad agur
De noss quolms la loscha feglia —
E confessa si’ amur.
Cheu seschlargan las cadeinas;
Ed uss va ei senza cal
15Cun fraccass giù dalla pézza
Tier las nozas ella val.
Il murdiu.
(Nach Igl Ischi, S. 128, 1900.)
Tier la crusch leu sper la via
Vegn in vegl, sfraccau murdiu;
Cun in schem sefier’ a tiara:
O tgei viver, ti miu Diu!
5 Strusch hai jeu vestgiu en veta,
Au’ e paun gnanc mintga di;
Schia sai pli ditg ca viver. —
Oh savess jeu oz muri!“
El marmugna e suspira. —
10Cheu selain udir ils pics
D’ in utschi, che stedi petga
Vid il bratsch dil crucifix.
Il murdiu l’ egliada aulza,
Gl’ utschiet ei prest daven,
15„Pera sgola“; el mo vesa
Il salvader vid il lenn.
„Co eis Ti nius Spindrader,
Ti has bein giu tribel freid;
E con ditg has vid las guttas,
20Ti pitiu stenschenta seit!“
Vid la crusch sco cadanada
Ei l’ egliad’ dil pauper vegl;
Plaun e plaun il frunt sereina,
Larmas roclan ord igl egl.
