 |
Questa pagina è ancora da trascrivere o è incompleta. | |
Il preses, il freid nuncartent, stat e mira,
Co nus ses idols per la prad’ e cultira
Duein compignar. — Tgi sa liberar
Zacû il nies pievel dagl jester barbar
185E derscher finalmein ils dieus dils Romans,
Cul scalper formai e tut suords e vans? —
Ei dat bein in Diu d’ intelletg e tschurvi
Cun senta, savida, che cloma il di,
Che cloma la notg e direg’ il solegl?
190Che rocla il tun de sterment e smervegl?
Tgi sa bein numnar il ver esser che viva,
Dal qual sin quest mund la carschientscha deriva?
In tschupel matatschs, circumdont la figura
De Maja, arrivan en verda mondura.
195Ensemen culs frars arvals, sacerdots,
Che giesticuleschan sco faulzs devots,
Els contan il hymni als dieus de verdura,
Ch’ els tegnien daluntsch la sventir’ e malura:
„Gidei nus, o Lares, scatschei pestilenzas,
200Dei benedicziun a tut nossas semenzas,
Bugnei cun rugada il pastg sin collinas,
Schei buca curdar sin la vit las purginas.
Domogna la furia, o Mars, e retuorna
El tempel e ferma burascla stuorna!
205Clamei vicendeivlamein tuts ils Semuns,
Suquora, o Mars, il triumf dai als
buns!“
Las vuschs giuvenilas rebattan festiv,
Il til uss s’ avonza el plaun solegliv,
Sin tiara tumpriva de segal e megl.
210Tras fein e faletga direg’ in fumegl
Ils tgaus destinai all’ odierna unfrenda,
Purschi ed anugl e vadi ein la spenda
Pils dieus permavauns. Els van tier la mort,
Siglient en sparuns, nunsavent la lur sort.
215Treis gadas semeina tras fop e fistatg
Entuorn la cultira la quorsa dil matg.
Sper via terlischa, schi bi sc’ in rubin,
Il brutg che flurescha, e mintga verdin
Selegra bognaus en daguots de rugada,
220Selegra che l’ aria dil matg ei turnada. —
