 |
Questa pagina è ancora da trascrivere o è incompleta. | |
25Il tgiern ha clamau tier la fiasta magiala,
Il tschiel ei sereins e verdura vernala
S’ encaglia sin rovens spundivs e pastgets.
Romans, festinei! Caminei è vus Rets,
A Mars ed a Maia l’ honur veis de render,
30Leis vus dalla tiara raccolta pretender.
Dad acclas e cuorts per las spundas semnadas,
Si dallas Planezas, dal criec rugadadas,
Arrivan en trops discurent catschadurs,
Colons e migiurs, veterans e pasturs. —
35Desegna, canzun temeletga, las fatschas
Dils umens e legna pertratgs e smanatschas.
Cheu vegn dal Tuliu cun ses fegls vigorus
Vintrix cul balester, in um prigulus,
In um che siglienta igl uors cun inschin,
40Domogna las bestias tras forz’ e rampin.
Vid l’ éscha dil ficler en loscha parada
Stat corna de bovs e de tscharvas fermada;
En l’ aria sut tetg, sper la fueina en tegia,
Leu pendan las puolpas sin lur pendelegia. —
45Schlatteina taurisca el numna la sia,
„Nos celtics babuns“, el raquenta sin via,
„De Mars e Minerva savevan nuot zun,
Unfrevan a Belin, scaffider dil mund,
Sils aults della Gielgia, sil fil dil Lucmagn
50Il saun ded in grass capricorn bien e stagn,
Fertont che l’ aurora las pezzas bitschava,
Da Belin salids giu da tschiel nunziava. —
Nies Belin, mes fegls, nus oz invochein,
Ils dieus dils Romans ein de marmel e stgein.“
55La casa e cuort Runcalinas banduna
Victor, il puranchel de rara fortuna;
Egl agien curtin, da palèra tschinclau,
El ha tut en retscha enfiarlas plantau;
Cheu sgolan aviuls entuorn ’gl ualer,
60Cheu stattan en flur il malèr e tscharschèr:
Victor de schlatteina etrusca pertratga,
Con bein si’ accletta sei uss serefatga.
Sin via satieu’ el pasturs e vischins:
