E suenter madir ponderar di il muliner: 3130„Quei po gl’utschi, che di la verdat saver!
Quei sabi utschi ei d’anflar en in casti.“
Il giuven dils frars ha ussa ruaus pauc pli.
Gl’utschi, che di la verdat, el vul encurrir.
Sin in cavallut ins vesa naven el ir — 3135El ei sil cavagl schi bials sco il matg flurent,
Lunsch ora el mund el va e stat naven.
Tut adumbatten ei spetgan el anavos —
Ed el mulin a tuts quei para curios.
Il frar pli vegl bein gleiti vul empruar; 3140El va sin viadi per igl utschi ed il frar.
Mo era quel ei buca turnaus el mulin;
La sora Sibilla va ora sil crest vischin
E spetga e spetga e lai encrescher pils frars
E larmas pendan osum ils egls schi clars.
3145Sibilla ha liung’uriala e suenter in onn
Vul ir sin la tscherca er’il niebel affon,
Che ha la fatscha ded aunghel cun egls blaus,
Che enconoschientscha negina han cun puccaus.
La glieut dil mulin dal bargir han egls cotschni, 3150Da quei commiau e pils giuvens, ch’eran svani.
Dad in plaun ora la giuvna ei cavalcada —
Cun flurs nundumbreivlas surtratga ei la prada,
La via va suenter in legher ual cantont
E giu da tschiel sclarescha solegl scaldont.
3155En in uaul la via ei lu untgida,
Dad ina veglietta la matta vegn retenida:
„Ti vas pigl utschi, che di la verdat, pils frars,
Jeu dun a ti in cussegl, ch’ei scarts e rars:
„Vul ti reussir, mai, mir’anavos sin via, 3160Udesses ti era bia cloms e suns de legria!“
De buc emblidar gl’avis ha ell’empermess,
Ed arrivada dado gl’uaul stgir, spess,
Ves’ella in lag grondius sut ina collina
E silla tschema de quella siala alpina, 3165Stat in admirabel casti. Ed ella di:
Si leu savess fors’esser il sabi utschi.
