 |
Questa pagina è stata trascritta e formattata, ma deve essere riletta. | |
| Festa della raccolta | 611 |
sur las generaziuns dels seculs venturs, e chi so che cha vela la fundamainta, sün la quela el fabrichet sia chesa; chi so sch’ella nun vain be auncha as consolider lönch zieva cha sia part mortela ais terra e puolvra: chi so scha nun sorta üna manzina da sia chesa e scha quella nun dvainta ün bös-ch e scha’ l bös-ch nun porta sieu sem pür lo vi in quel lö (temp) lontaun, inua noss sens ed impissamaints nun paun transir. Vus m’ inclegiais dimena. Ad ais temp da raccolta e la spia dvainta madüra; ma che ch’üna suletta spia d’ graun vela, que surpassa nos savair, nus nun podains nemain calculer per avair ün’idea. Uschè po crescher l’umaun in quels pochs ans da vita, ch’el resta in benedicziun per tuot avvegnir. Quaista ledscha, fatta per nossa creschentscha spirituela, stovains perscruter, scha ’la saja buna, scha ’la vela qualchosa, e scha ’la saja prodot da casualited u manifesta sabgentscha e scopo; sch’ella saja umauna, u dalla terra, u dal spiert, ed allura podains gnir a savair, perche cha celebrains üna festa da raccolta e d’ingrazchamaint vers Dieu.
* * *
Dilets! Tuot cuortamaing vögl applicher que cha dschet dal singul umaun all’umanited in general; allura vzais la medemma chosa in sias dimensiuns pü grandas ed extaisas, schabain cha’ l temp della raccolta finela nun ais gnieu per l’umanited, e chi so cur ch’el vain! Eir la chüna dell’umanited ho Dieu miss giò nels temps remots, la cuvernand cul zindel del misteri inperscrutabel; ma nus savains, cha il prüm eiran ils pövels sulvedis e’ ls nomads. E quels eiran per taunt pü fortünos cu nus. A nun savaivan nouvas da quellas cuorsas del temp modern, fattas per vair scha’ l concurrent nun stovess succomber e spirer; a nun eira taunta richezza d’or, chi faiva glüschir ils ölgs, ne’ ls palazzis, chi invidaivan ils umauns a gnir as trattgnair. Quels pövels nun cognuschaivan quels bgers e grands bsögns, chi sun la calamited da nos temp; ad eiran pü ferms e robusts; a nun eira la deblezza cun sia tschera sblecha, chi spassegiaiva tres las vias dellas grandas citteds; la nun eira auncha naschida, la nervusited del temp preschaint, chi scu üna furia cuorra sur munts e cuolms, molestand fingiò il scolar nel baunch da scoula. E pür quels pövels stovettan ir our nel combat: Els stovettan ir our nel combat cun bestias sulvedgias, cun forzas della natüra e nella guerra dels ferms cunter ils debels. A gnit il combat per l’existenza; a gnit il stüdi e clamet l’umaun a nouva lavur; a gnittan las bellas arts ed avrittan lur portas; a gnit il progress e’ ls stimulet da redubler lur forzas. Uschè cumanzet, cha nun as savet cu, as former la spia e’ l plain furmaint in quella; e fingiò ais ella uschè plaina ed ho piglio telas dimensiuns, cha nus ans fermains plain d’admiraziun uschè sovenz cha la guardains.
39*
