 |
Questa pagina è stata trascritta e formattata, ma deve essere riletta. | |
ANDREA MOHR.
Survista della literatura ladina.
(Annalas XVI, p. 53 — 74.)
II. Part.
La literatura scripturada e stampada.
Nella conferenza antecedenta ha eu tentà, da ’Ls metter in ögl ils principals rams da nossa litteratura vocala; hoz a diluzidaziun finala del tema, am propon da ’Ls dar que ch’els viavant avessan spettà, üna survista da nossa literatura scripturada e stampada.
Il material da quaist’ultima, in globo tut, es main defect, main fragmentaric, co quel della prüma. Essendo plü complet, es el eir bler plü ampel. Ma qualitativmaing il chattain nus, almain in part, main original, main immediat, main indigên o nazional, e plü sco provenienza importada d’utro, in spezial dalla Svizra bassa o dalla Germania. Cognitamaing füt el da plüs fingia perlustrà. E tocca ch’eu aquia releva da chi.
P. J. Andeer1, meis antecessur in Tschlin, furnit il prüm, con seis register dels plü remarcabels cudeschs scrits o stampats in nos linguach, aggiunt a sia lavur supra istoria ed origen del linguach romantsch, a Dr. Friedlieb Rausch2 il desiderà e necessari material per si’ istoria della literatura reto - romantscha, publichada sco la prüma in quaist gener 1870. Emendada e relativmaing complettada füt eir quaist’ovra da Dr. Decurtins3) in sia istoria della literatura reto - romantscha, ossia nella s-chiza, ch’el da quella dà in G. Gröber’ s Grundriss der romanischen Philologie l’an 1897.
Am permet in passand da relevar, cha l’ovra da Rausch, dedichada a Dr. Lorenz Diefenbach, famus poliglott e spezialist per linguas romanas
