 |
Questa pagina è stata trascritta e formattata, ma deve essere riletta. | |
| 540 | Andrea Vital |
El as remettet pero bain spert, fortünadamaing sainza cha l’accidaint avess laschà qualsia consequenza dürabla.
Returnà da Fetan a chasa ed arrivà all’età, inua as sto scheglier üna vocaziun, as resolvet Pallioppi, sgür sün recomandaziun da sia mamma e da seis paraints, da gnir pastizier. Quaista decisiun non ans da da buonder; perche da quel temp, sco amo lönch plü tard, quasi tuots ils giuvens engiadinais e specialmaing quels d’Engiadin’ota as dedichaivan a quaist manster. Lapro ais da considerar, cha la famiglia Pallioppi eira svessa interessada in pastizerias a Turin, inua nos Zaccaria avess gnü da far seis giarsunadi. Ma fingià davo trais mais eira el da retuorn dalla bella chapitala piemontaisa. Evidaintamaing la lavur d’ün giarsun, chi consista nel principi plü in lavar plats e magöls, nettiar la cuschina e scuar la buttia, co in couscher sfögliadas e grassins, non al plaschet, e sia mamma acconsentit a seis giavüsch da frequentar scoulas superiuras e’ s dedichar al stüdi. Sainza dubi nutriva ella la spranza, da vair seis figl ün di in chappa e murinellas, e chattaiva in que la consolaziun per ils sacrifizis pecuniars, ch’ella faiva per el.
Usche as fet que, cha Pallioppi l’utuon del 1835 avaiva brattà il scussal alb e la chapütscha alba da pastizier o, sco cha nos vegls dschaivan, da s-chaliter colla uniforma e la chapütscha blaua da ginnasiast alla scoula cantonala, inua el fin l’an 1841 absolvet il ginnasi. Dal material offizial non podet eu relevar oter; percunter ans relateschan ils protocols e l’archiv della Zofingia bainquant davart il giuven student. Pallioppi füt commember da quaista società dals 15 Settember 1838 fin als 4 Avrigl 1841. El stovet bandunar la società e la scoula causa malattia; nus non indreschin pero, sch’el ais darcheu turnà a Coira nella scoula o be a far seis examen da maturità e non survgnin nell’ bricha relaziuns pü detagliadas davart quella malattia.
L’actività da Pallioppi nella Zofingia füt fich intensiva; el eira con ün pled dit il poet della società. Fingià sia domanda da gnir acceptà sco member della Zofingia ais scritta in fuorma poetica. Amo sco candidat surpiglia el la redacziun del Anonymus, ün periodic poetic - umoristic - satiric, chi serva a condir il seguond act dellas seduttas. El resta fidel a quaist seis impegn fin al momaint, ch’el sto sortir dalla società, schabain cha, contrari als statuts ed allas impromissiuns, ils oters members non l’assistan dafatta brich in sia spinusa e stentusa lavur. Sovent as legia nels protocols la notizia, cha l’Anonymus haja allegrà la compagnia o con üna zarta o eleganta poesia lirica, o con üna bella traducziun metrica dad Ovid, o con üna ballada elegica, o con üna mordainta satira. Eir otras lavuors poeticas da Pallioppi co quellas comparüdas nel Anonymus sun notadas nel protocol con debit lod, p. ex. Guardaval. Glycerens Kranz ed
