 |
Questa pagina è stata trascritta e formattata, ma deve essere riletta. | |
| Giovannes Mathis | 529 |
Auncha duos oters mats da circa l’istess’eted partivan cun mieu frer per Berlin nel istess negozi, ün mieu cusdrin e T. Briesch, figl da Jos. Briesch da Surleih. Sco a tuots quels chi partivan sulets la prüma vouta, Maschel Chasper als det üna „Marschroute“e 5 sechins ad ogni ün per las spaisas del viedi.
Il di 15 Gün mieu frer e mieu cusdrin partittan la damaun a bun’ ura da Crasta. Püss mats da Schlarigna ils accompagnettan fin Silvaplauna, inua tar las Kinschis chattettan Jos. Briesch cun T., sieu figl. Jos fet purter aunch’üna mezza d’ vin pel cumio, e nus mats accompagnettans auncha ils trais viandauns fin tar la funtauna del Tiroler, portand nus lur tornisters fin lo.
Ah, pür cur cha piglet lo cumio da mieu frer chi eira saimper sto bun cun me, sentit quaunt ch’eau perdaiva, nun l’aviand pü. E cura cha turnet a chesa sainz’el la fadia da ma mamma e da mias sruors füt darcho pü viva. O quaunt trista e dolorusa eira da que temp la separaziun, surtuot per üna mamma, chi avaiva da lascher partir sieu infaunt in uschè zarta eted, a pè, per viedis chi düraivan passa trais eivnas, e dal quel durante pü d’ün mais ün nun avaiva üngünas nouvas.
Zieva 21 dis d’ viedi ils trais mats arrivettan felicemaing a Berlin . . . .“
Nel 1838, Peter turnett in patria. Sieu frer discuorra da quist retuorn in sa lavur „Nossa veglia ura d’ stüva“, scritta il di da sieu 60 evel anniversari, 7 Gün 84, e publicheda nellas Annalas 1891.
„Quatter anns zieva (dal 38) gnit el a chesa e fet darcho la granda part dal viedi a pe.
Nus al spettaivans da dì in dì!
Üna nott, pochs momaints aunz mezzanott füttans sdasdos tres pichs da noss pichaporta!
O que ais el, que ais sgür noss Peter, dschet ma mamma, currind sün fnestra. Chi picha? dschet ella.
Be eau, il Peter, tieu figl, mamma chera! dschet el.
E pochs momaints zieva cha tuotts in stüva al vaivans strandschieu a noss cour, e l’inturaivans al guardand cun immens’algrezcha, nossa prüved’ura battet mezzanot.
Ella ho auncha saimper glistess cling, dschet mieu frer . . .“
Il frer Peter varò quinto sü in lung ed in larg da Berlin e da sas bellezzas. E Giovannes savaiva da löng innò cha per gnir rich as stu ir nel muond. E da löng innò vaiva ’l decis da fer scu ils oters e dad ir nell’ester a fer rapps. Nel 1837, siand a chatscha cun sieu bap e meister Peter Allemann nella valletta da Samedan, inscuntra ’l Sar G., rich pastizier.
| Rätoromanische Chrestomathie VIII. 2. | 34 |
