 |
Questa pagina è stata trascritta e formattata, ma deve essere riletta. | |
| Il Curunel e las tratschoulas da Deta Petz | 475 |
La prüma Dumengia d’October, füt ün da quels dis clêrs e serains d’utuon, chi’ ns faun vair il Tschel pü blov cu’ l solit, e cha quel a tuots ans disch:
Uzè voss sguard vers il Segner, e ingrazche’ l per tuots ils bains e benediziun ch’el darcho as ho largiamaing concess.
Que di, nel nouv e pompus taimpel da Schlarina, sto termino da fabricher be daspö pochs ans, ün „Nouv Pêr“gniva lo unieu e benedieu dal minister del pled da Dieu.
Que pêr eira: Gudench Salis e Deta Petz!
Fich nombrus eiran ils fortünos chambrers, stôs invüdos a pigler part all’algrezcha e leidezza dellas duos famiglias Salis e Petz, e lur paraints.
Vers la fin del grandius „Gianter da nozzas“dels sur numnos (cur cha eir quels chi uschiglò tschauntschan poch, dvaintan fich eloquents e discursivs, e quasi saimper, cur cha’ l vin fo sieu effet, tschauntschan pü cu’ ls oters), Nina chi eira tschanteda sper duonna Chatrina, sa patruna, la dschet suot vusch.
Fortüna del vivaunt Dieu, dolur, sfruntur, duonna patruna, cha’ l Segner ans stetta tiers, ch’ell’al guarda, el comainza a avair quella tschera rianteda e pchadusa da St. Rocus, güst sco cur sch’el as prepara per ans dir sia eternela sentenza salomonica del Destin.
Ella vzarò cha uossa per la fin del gianter, an’ s serva’ l sgür auncha üna discreta doscha da sieu gramazchus „Tuot ais Destin“mangiand la buoglia da spusa.
E quaista vouta podains esser sgüras, cha que sarò bger pü lung cu’ l solit, perche eau chi in tuot vez dalöntsch, he remarcho, cha cur ch’el ho bavieu ün magöl d’ vin pü cu’ l solit, explicha’ l eir la geremiada bger pü in lung ed in larg, o cha’ l Segner ans detta sa buna, sencha pazenzcha.
E Nina darcho avaiva ingiuvino, cha’ l Sar patrun avaiva vöglia da dir qualchosa, perché apaina ch’ella avet dit que a duonna Chatrina, el fet segn da fer silenzio, e dschet:
Stimêda Compagnia!
Hoz, il pü bel di da ma vita avess desiderò, cha na bè tuots noss paraints e bgers amihs piglessan part a noss’algrezcha, ma bainschi nossa chera Schlarina intera.
Sco ch’els vezzan, eir noss brêv e bun guaiteder „Duri Pain“ais ün dels chambrers, e cun vair dalet al vezz hoz qui’ traunter nus.
Schi! eau he gieu gugent cha quel, cha tuots savains, chi conscienziusamaing fò sieu dovair, chi durante cha nus quiettamaing dormins la not, vaglia per nus, e guarda cha üngün prievel ne disgrazcha nu’ ns imnatschan, piglia eir part a noss’immensa leidezza e dalet.
