 |
Questa pagina è stata trascritta e formattata, ma deve essere riletta. | |
| Il Curunel e las tratschoulas da Deta Petz | 469 |
D’ün momaint a l’oter am claman eir a mê sgür e tschert cussü.
Que ais quella buna, scortà Signura Clergia chi ho tuot combino.
Sterzas, ch’el füt davent tuotta di, sco he gia dit, ais el sto gio Zuoz e l’ho domandeda.
O nouva ponderusa, algrezcha inefabla, cha suosch quasi dir celestiela, uoss’ais que fat, e poss dir a tuots cha que ais eau, be eau chi’ l hè cussglio dalla pigler.
Amô figl mieu, benedieu ögl gross, eau nun poss propi pü spetter il momaint d’at straundscher cunter mieu cour e’ t benedir.
Be am péra cha las confidenzas avess el podieu ans fer a tuots trais insemel, ma Gudench avaro sgür vulieu esser sulet cun me per am dir sia algrezcha, e podair pü cordielmaing m’ingrazcher.
E bain bod Maschel Jannet e duonna Chatrina gnittan gio da stüva sur e sco cha Nina avaiva previs, duonna Chatrina la dschet soriand:
Gudench a’ t giavüscha d’ir ün momaint tar el e el ho da’ t tschantscher d’ün affer da summa importanza.
E bain mieu figl, e bain mieu fortüno spusin, dschet Nina intreda in duos sagls in mezza stüva, sgualatand la testa e tignand sieus mauns sü’ ls chaluns, che’ t ho saimper dit ta Nina, ch’ell’ais schafida, ch’ella vezza pü dalöntschs cu tuots oters, che m’in dist?
Schi figl amô, ta Nina ho tuot vis e previs e predit.
Ma avaunt tuot di’ m uossa la frauncha, la schetta, la püra vardet, nischi Gudench, cha la müsted ais ida sterzas, il di cha tü est sto davent da chesa della damaun, fin tard la saira, nischi figl, cha tü est sto que di gio Zuoz alla domander?
Na ma chera Nina, dschet Gudench, la pigliand il maun, tü’ t falast, eau nun sun sto gio Zuoz ne que di, ne oters.
Sterzas, il di ch’eau nun gnit a chesa cu la saira tard, sun sto durante l’inter di in god cun ma spusa, chi sgrataiva arüd spêr il Sass - Manella, ed eau cu’ l champach he portô nò l’arüd fin tar la via d’Andrea Gobètt.
E poss bain t’asgürer, cha que di füt ün dels pü bels e pü daletaivels da ma vita.
Ma eir hoz sest ma Nina, ais per mè ün di d’incomparabla algrezcha e leidezza, perche hoz ais il di cha a vus mieus chers as fatsch la confidenza, cha per compagna diletta da ma vita hè tschernieu la figloula da ma mamma „Deta Petz“nossa chera chantunaisa, ch’eau se, cha taunt tü, cu mieus genituors l’avais saimper volida ün grand bain.
Sco petrificheda Nina restet durante ün bun momaint in mez la stüva sainza savair dir niench’ün pled.
