 |
Questa pagina è stata trascritta e formattata, ma deve essere riletta. | |
| Il Curunel e las tratschoulas da Deta Petz | 467 |
Maschel Jannett stet però bger pü lönch cu Duri, sü’ l baunch a guarder que chi’ s passaiva nella stüva, e gnieu gio dal baunch riand da cour, e cun ün sorir d’algrezcha cha Duri nun podet vair, al dschet:
Schi mieu cumper, vus avais pür memma radschun, que ais sgür il spiert ù visiun, cha vzaivas a gnir la not our dalla cligna da duonn’Annetta nella giassa, e da lo tres las sfalizzas dellas assas da mieu talvo in chesa mia.
Ma uossa cuaint in stüva ais que bain pês, la povra disfortüneda Deta Petz, as defenda taunt ch’ella pò, e tuots duos s’haun clappos güst intuorn culöz e provan sgür da’ s strangler l’ün l’oter.
Schi mieu cumper, voss bun bap barmör avaiva bain radschun cur ch’el as dschaiva: „scha me vzessast la not qualchosa d’ surnatürel schi vo par ta via, e nun ir a tscherscher que cha tü nun hest pers.“
E que vulains fer eir nus, e giains a chesa, que ais sgür pü radschuno e pü prudaint.
Bain spert tuots duos sortitan dal üert da duonn’Annetta, e s’instradettan per ir a chesa, Duri pü anguschagio e spavento cu mê, e Maschel Jannet soriand d’algrezcha, e’ s dschand:
Oramai noss amô figl nun parta pü per Paris, eau’ l cugnuosch memma bain, el ais memma brev e onest, per ir tar Deta, be per la schnaranter, els sun spus e sgür spuseron gia d’utuon.
Gudench nun ans ho auncha anunzchos sia impromissiun cun Deta, be per via da quella bluorda Nina, chi volaiva saimper al fer spuser Signuras, e forsa fò mel viers, saviand ch’el ho tschernieu Deta, sainza la dumander cussagl.
E quaista vouta Giunfra Nina da Salis, nun ho vis pü dalöntsch cu’ ls oters, e que ho’ lla d’uoss’invi d’odir pü d’üna vouta, sco eir cha sgür „Tuot ais Destin“e cha eir l’impromissiun da Gudench a Deta, Dieu chi tuot guida e destina, avaiva destino e decis, e cha sieu agir da bluorda, per procurer a Gudench üna Signurina nun ho servieu ad ünguotta, perche cha „Tuot ais Destin“e ünguotta nun ho lö sainza la volonted del Suprem.
Dalun intro in chesa, Maschel Jannet as zoppet in talvo, e bain bod vzet a comparir Gudench chi passet tres il vöd furmo dall’assa ch’el avaiva levo aunz cu ir tar Deta, è da lo ir sü per schela d’ crapenda in stüvasur inua ch’el dormiva.
La damaun zieva, all’ura cha Gudench solaiva s’alver, Maschel Jannet get tar el in stüva sur, e siand el gia alvo, in al brancland al dschet:
Bundi Sar spus, sun gnieu a’ t giavüscher benediziun, possast passer bgers ans felices cun ta chera Deta.
30*
