 |
Questa pagina è stata trascritta e formattata, ma deve essere riletta. | |
| Il Curunel e las tratschoulas da Deta Petz | 463 |
chosas, e poss darcho al gürer cha nun he dit que ad orma vivainta, saviand bain cha que metess in spavent ils sieus e l’intera vschinauncha.
Eau s’ingrazch fich Duri, cha avais tgnieu que secret, e’ s giavüsch in amur da Dieu da taschair eir d’uoss’invi, eir as recompenserò per que.
Vus savais bain cha taunt ma duonna, cu Nina, scha gnissan a savair cha üna visiun in spiert intra ogni not in nossa chesa, ellas sgür e tschert nun stessan pü niench’ün momaint in chesa, surtuot la not.
E poi il pes füss auncha per Gudench, chi nun craja ne a striamainta, rimurs, spierts ed oter simil, quel, sch’el gniss que a savair as zuppes dalun in talvo, armo da sa speda e pistola, e bain sgür arivess üna disgrazcha, perche as batter cun creatüras cun charn ed ossa, ais üna chosa, ma vulair druver armas cunter spierts, visiuns e rimuors, ho pür memma gia custo la vita a bgers increduls.
Ch’el stetta pür sainza üngün pisser, mieu stimo Sar cumper, dschet Duri, el po esser sgür e tschert cha tres me üngün me nun savero que, e gugent, fichun gugent, vegn cun el quaista not, usche po ’l eir el as persvader, cha que ch’eau l’he dit ais vardet, e vair el svess la terribla spaventusa visiun, la rimur, è simlas chosas.
Dunque essans inclets, dschet Maschel Jannet, allas 11 e ½ podais gnir, e chattaross la porta d’ cuort be stumpleda cunter, ed eau saro in stalla.
Ed uossa gni, schi giains auncha ün momaint in murütsch.
Dalun cha Maschel Jannet e Duri füttan sortieus da stüva, per ir sün stüva sur, Nina dschet a duona Chatrina:
Sgür darcho üna da sas solitas confidenzas u visitas, sco cha Duri fo a bgers per ir poi in murütsch, ma eir in que he vis pü dalöntsch cu bgers oters, cioè cha el vo saimper be tar quels chi haun vin in chesa.
Cur füt quasi mezz’ura cha Maschel Jannet e Duri eiran sün stüva sur, Nina comanzet as inquieter e dschet: che dianzer mê ho ’l bain dal dir, cha staun taunt lönch cussü?
Ma cur füt passeda ün’ura, daspö ch’els eiran partieus e nun gnivan auncha, Nina teribelmaing agiteda comanzet a spassager sü e gio per stüva, e dschet: queco nun ais üna dretta chosa, in amur da Dieu duonna patruna ch’ell am dia que ch’ella craja cha Duri hegia bain dal dir?
Che voust ch’eau sapcha, dschet duonna Chatrina, schidasenna cha craj eir eau, cha qualchosa d’insolit al dia’ l, uschiglo sgür cha Jannet l’avess gia do il magöl d’ vin e spedieu.
O benedida duonna patruna, dschet Nina, ch’ell’am lascha ir sü be ün momaint a tadler sper l’üsch, ed ella so bain eir ella cha schafida sco cha sun, udind be ün per pleds da que cha dian, se dalun da que chi’ s tratta, dal A al Z.
