 |
Questa pagina è stata trascritta e formattata, ma deve essere riletta. | |
| 462 | Giovanni Mathis |
chi nun ho pos, sco pür memma l’orma del Preir da Crasta, cha taunts haun gia vis lò in baselgia e in sa chesa, chi tuocha la baselgia?
Quaunt a que, na da senn, in conscienzcha mia nun savess al dir dschet Duri, ma eir el so sgür, sco tuots saun, cha sün Albanas ais ün hom, chi cognuoscha tuots quels malefizis, ù megl dit, ün Striun e Inchantadur, della prüma spezcha.
Quel sò fer, e venda puolvras e simlas chosas, per scongürer ogni sorts, spierts e rimuors, saja visiuns dal malamm, sco eir ormas dannedas, e vain dit cha inua ch’el ho scongürö ils spierts da tesors, pü d’ün ho gia chatto in chesa sia monaida zuppeda.
Ma las puolvras e robas ch’el venda, per scongürer las povras ormas chi faun rimur, quellas venda’ l bger pü cher chi las otras, e sò eir dalun chè qualited d’ spiert, ù visiun chi ais quella ch’ün vezza, be in al dschand cu ch’ell’ais fatta.
Sch’el giavüscha ch’eau giaja al tschantscher, pervia della visiun chi vain in sa chesa ogni not, schi part dalun e gia vers las duos sarò quia.
Tadle Duri, dschet Maschel Jannet, eir eau he gia bger odieu a discuorrer del „Striun d’Albanas“ma he eir odieu a dir da persunas rispetablas e bain informedas, cha ’l Striun d’Albanas e sa duonna, vaun els la not nella chesa inua vain dit chi fo rimur, a fer fracasch e cha els svess sun la rimur, e que baininclet, per podair vender lur puolvras e diavlarias simlas als povers ignoraints.
Eir se da buna part, cha a St. Murezzan ün tschert Signur, cha vus ed eau contschains, ho do al Striun d’Albanas divers bels zechins da Vnêscha, per cha quel fatscha rimur in üna chesa ch’el avaiva vöglia da cumprer, e in que möd ün aun zieva survgnit la chesa per la mited da que ch’ella valaiva.
Aunz chi’ s trametter a tschantscher a que hom in merit a la visiun chi vain in ma chesa, sch’eir se d’avaunza da gnir amalo dalla temma, vögl la vair eir eau, baininclet in giant con vus, e scha vulais schi quaista not, cur avais clamô la prüma vouta las uras, gniss qui’ tar mè allas 11 e ½, e zieva avair piglio curaschi in mieu murütsch e miss’ nels mauns da Dieu três l’uraziun, giarons, ma sarò auncha megl cha giajans dall’otra vart, cioè tres l’üert giarons davous la chesa da duonn’Annetta, e lo tres la cligna vzarons allura, scha la rimur vain our dal talvo nella cligna, e siand in fatscha a mieu talvo vzarons eir cu ch’ella fo per passer tres las assas?
Ma avaunt tuot dschè’ m Duri, nun aveross forsa gia tschantscho da que als voss u ad oters?
Na, na mieu cher Sar cumper dschet Duri, eir scha que pera, schi in bgerras chosas, nun sun sgür pü cott a dür cu bgers oters e simlas
