 |
Questa pagina è stata trascritta e formattata, ma deve essere riletta. | |
| 444 | Giovanni Mathis |
forza, cha’ l tagler as cupichet, e’ ls tôchs d’ chaschöl gettan tuots per maisa intuorn.
Schi „Destin“, per il saimper tuot ais destin, e scumett ma testa cha scha nossa chesa clappès fö, schi per el füss que darcho destin, e per conseguenza nell’ niencha da pruver da stüzer il fö, nischi?
Na, pür cha’ l sapcha „Tuot nun ais Destin“, il Segner güda schi, ma eir nus stovains ans güder, ans inschigner, mouver e sdovler, scha vulains reuschir in bgerras chosas, parvgnir a noss scopo, e gnir três nel muond.
Da que avis e parair eiran eir mieus buns barmörs, taunt mieu bap cu ma mamma (cha’ l Segner hegia arfschieu lur ormas in sia gloria)! In que momaint arivet Gudench!
Quista damaun hest dormieu pü lönch cu’ l solit, al dschet sa mamma, zieva l’avair dit bun di, ma tü est eir gnieu brav tard, poch aunz mezza not, que pêra cha tü’ t divertast passabelmaing in compagnia.
Schi mamma, dschet el, eau’ m divert fich bain, eau chatt uschè bel quella liberted chi regna quia traunter giuvens e giuvnas e surtuot cha tuots as tüagian.
Eir am plescha quella sincera famigliarited e allegria, sco eir quellas bellas e armoniusas chanzuns cha chantains tuots insemmel passand tres las vschinaunchas, ah che diferenza dals costüms da nossa chêr ’Engiadina, als costüms e üsaunzas nel Ester.
E poi nossas mattas sun tuottas uschè allegras e amiaivlas, cha que ais propi ün grand dalet per mè d’ir la Dumengia saira in compagnia.
Ma nun and füss forsa üna, ù eir pü d’üna chi’ t pleschan pü cu las otras, dschet Nina, tü est bain poch confident cun ils tieus?
Schi ma Nina, dschet Gudench, que ais saimper stô e saimper sarò, ed eir eau he pü simpatia e bainvöglenscha per üna da nossas giuvnas cu per las otras, ma que cha eir a’ t di per sgür, cha mê nun la farò vair ch’ella am plescha, perche forsa ch’eir ella pigless allura bainvöglenscha per mè, e que füss sgür ün mel e dann per tuots duos.
E chi mè füss quista preferida da Sar Gudench, e chi probabel ün di sarò „Curunel“, dschet Nina al fissand bain in fatscha, nun füss que possibel cha eir nus sapchans chi ch’ell’ais.
Na ma chera, dschet Gudench, dvanto serius, digia cha nun vögl ch’ella sapcha ch’ell’am plescha, nun vögl nell’ ch’üngün sapcha chi ch’ell’ais.
Tü nun voust ch’üngün sapcha chi ch’ell’ais! dschet Nina cruschand sieus bratschs sü’ l sain, e’ l guardand cun ün sorir quasi da sdegn.
