 |
Questa pagina è stata trascritta e formattata, ma deve essere riletta. | |
L’hest vis, l’avais vis? l’ais arivo er saira; l’ais vtieu d’ofiziel, üna fich bella mundura, e chi’ l sto bain, fich bain!
Que as dschaivan las giuvnas da Schlarina, ün dels prüms dis d’ Meg del ann 1690!
Mo Dieu, sco eau nun al chatt allura quista summa bellezza, dschaivan eir püssas, schi Gudench ais grand e bain creschieu e sia unifuorma ais bella, ma sgür bgers da noss giuvens, scha füssan vstieus sco el, fessan taunta e forsa eir pü parada cu el!
Ma bè per sè, güst quellas sospirand eir as dschaivan:
Ah, chi bel giuven ch’ais Gudench, e cu ch’el chamina vi svelt e cun grazcha, cun che maniera e amabilted ch’el salüda e tschauntscha a tuots, Ah!!!
Quel chi eira arivo, e dal quêl tuot Schlarina tschantschaiva, eira Gudench Salis, giuven da 26 anns, l’unic figl da Maschel Jannet e duona Chatrina Salis!
Gudench Salis avaiva 14 ans, cur ch’el vzet üna vouta a Samedan ün curunel e duos ofiziels chi eiran arivos dal Ester!
Quellas bellas unifuormas plaschettan immensamaing a Gudench. Eau vögl dvanter eir eau ofiziel, e forsa „Curunel“, as dschet el e da allur’in vi sia idea fissa e continua füt d’ir in Frauntscha e s’ingager nella guardia Svizzera!
E cur ch’el avet complieu vaunch anns, nonobstante las larmas, suplicas e arövs da sieus genituors e Nina, lur fantschella, Gudench s’ingaget per sês ans, e partit per Paris, cun divers oters Grischuns!
- ↑ Scrit usche da quell' epoca.
