Pagina:Decurtins - Rätoromanische chrestomathie, VIII.djvu/377


Las Strias, Superstiziun e fantasia 367

Hans. Ach, guard' eu veiva que fingià … schmanchà
Da' t dir. Eu vegn in tschercha da magia
A x. pro' l sör dal bap del serrürier;
Siand eu he meis bouv e mia trima,
Chi van fich zops, per laschar tour il stort.
Quel pover stail e quella povra brüna
Non pon bod star in pè per la dolur;
L' ün ha nel pè davant, cha la chanvella
Ais tot unflada sü con grand chalur.
El' autra nel davò, ch' eu non poss muolscher
E neir stregliar indret dal grand zapàr;
Contin as lenscha ella quella chamma
U pür balestra sainza rafüdàr.
Crist. Fas bain! Ün sto pensar eir per las bestias;
Que ais il prüm dovair da lur patrun.
Hans. E quel vegliet — s' inclej' a simlas chosas,
Tot cuorra fin pro el pro guarischun.
El strusch' intuorn co' l man e fa grimassas
E tranter aint barbott' el pleds sot vusch.
Che pleds ch' el disch, üngün que non cognoscha,
Ma tant ais sgür, l' armaint ais subit frisch.
Crist. Schi schi, meis Hans! Que ais vardà. Pür cuorra
Pü bod tü post; ma di eir al patrun.
Hans. Abah! Che vögl eu dir, cha el non craja
Da simlas chosas gnanca ün bacun.
Allura sun eu quia nel servezzan
Fingià tants anns, ch' eu bod non sa dombrar,
E que ch' eu fetsch in chasa, tot respetta,
Infants e servitüt, perfin il frar.
Crist. Listess stos dir; perche scha els manglessan
A Hans, schi ch' els non giessan a tscherchar.
Hans. Par Diou! Tü has raschun. Per ch' els savessan
Ingio ch' eu sun. Schi schi, eu vögl clamar.
(Hans pass' oura e retuorna bainbod.)