Pagina:Decurtins - Rätoromanische chrestomathie, VIII.djvu/352


342 Caspar Bardola

E vol adüna seis princip per dret, —
Favell' e trumfa da contin sur oters
U tschercha da confuonder l' intellet,
Schi quel non sbaglia, d' esser ün magnat.
Corina. Na, na! El ais ün hom da cognoschentscha,
Chi guida tot ils fats da nos comün;
Lapro non manc' ad el l' experienza
E buna voluntà con diligenza,
Ch' el ais e reista qui pro nus il prüm.
Paulina. Da cognoschentscha lasch valair, ch' el saja;
Ma quell' experienza ais il fat,
Ch' ün saimper ha sustgnü — sa malattìa
Sco dictatur in tot l' economìa,
Usche, ch' el ais dvantà complet magnat.
Cur ch' ün comün contin medem hom tscherna,
Sco sia guid' in front ed in profil,
Schi perd' el l' aigna forza, stant el snerva
La giuventüm, e' s rend' a quel servil.
Lapro sun quels, chi braman löng il sezel
Pel solit spicolants a lur vantach,
Els giran e regiran quist lur mobil,
Infin cha' l grass als crouda in lur sach.
E' l pövel vezza tot, ma non cognoscha
Il fil, chi ais rantà pro quist regir,
Siand ch' el non ha pratica, ne suos-cha …
Plü domandar clereza sü' l motiv.
Perque sto ün comün pro vigilanza,
Tenor l' expressiun da meis patrun,
Müdar eir gio il sezzel da pussanza,
Con special resguard sün giuventüm.
Corina. Tü tschantschas hoz precis sco' n advocat,
Penetras con teis sguard fin sü' l politic,
Basand raschuns e prodüand citats,
Dals quals, per partim, sto convgnir vardads,
Ch' eu dubit ferm — scha sia humoristic
U pür teis serio.
Paulina. Serio e vardads.