 |
Questa pagina è stata trascritta e formattata, ma deve essere riletta. | |
FLORIAN GRAND.
La chanzun populera ladina.
(L’Engiadinais, Nr. 21, 23, 1879.)
La poesia ho, scu la lingua, si’ origine nella natüra umauna: naschida col umaun l’ais ella, per usche dir, üna necessited. Scu cha gia l’infaunt demuossa in sieus gös ün’irresistibla inclinaziun al fabuler, scu ch’ el s-chaffind tres sia fras-cha e productiva fantasia las pü müravgliusas figüras, personifichand e dand vita ad oggets inanimos e didichand a quaistas creatüras da sia fervent’immaginaziun ün’amur ed ün’affecziun usche sincer’e cordiela scu ad essers vivaints palesescha cleramaing sia vaina poetica, eir cha sias producziuns sajan auncha minimas ed irrelevantas: Usche demuossa eir l’umaun in generel ün possaunt dalet da’ s figürer e da’ s depinger ils oggets da lur vart estetica, e la poetica favella dell’eterna natüra, il gnir ed ir dellas variantas stagiuns, las sensaziuns, las delizias ed il cordöli della vita comouvan las cordas del cour a dutschs accords. E scu cha nell’aurora della vita l’activited della fantasia ais ün’intensiva, usche chattains nus eir nellas pü rimotas eteds dels pövels e dellas naziuns, chi non resentittan auncha l’influenza d’avanzeda coltura, ün’inclinaziun ferventa a producziuns poeticas.
Parallelmaing con quaist dalet vo eir la paschiun nel chaunt e da lander originescha la lingua poetica e sia natüra musicala.
Scha nus non possedessans perque nell’üngünas nouvas da noss antenats concernente la poesia e’ l chaunt, schi podessans nonobstante presumer con plaina sgürezza, ch’els sajan stos in possess da producziuns poeticas già ad ün’epoca, nella quela la lingua romauntscha non gniva auncha scritta, dimperse vivaiva be nella buocha del pövel, as transplantand dal bap al figl e servind in generel solum al traffic quotidiaun. Ma cognitamaing ans do nos compatriot Duri Champell in sia istoria retica e nella prefaziun da sieu Cudesch da Psalms positivas notizias lossupra, chi
