Pagina:Decurtins - Rätoromanische chrestomathie, II.djvu/691

Sagen

659

hagi la tatta si in cumet e ditgi traso: „Guotas e rabaizas, guotas e rabaizas.“ Autra glieut fetschien aber buca de quellas caussas. Lura ha la femna viu, che la tatta era ina stria.

115. La casa ch' ei schallada.

In mat, che mava savens tier ina matta, ei vegnius ina sera tier ella, che la giuvna e la mumma sminavan nuot e vesa co quellas purtavan in curte aua e schevan: „Tgi, che sponda mo in stel aua, a quel deigi la casa schellar ensemen sur siu tgau en. Nus lein ira a biala stiva ed essan segiras, che negin va cun rauba ord casa.“ Il giuven, che ha gleiti viu, ch' ei era duas de pigiels, ha spert dau in stausch, ch' il curte ei darschius … ed ei fugius cun dus segls ord casa. Miront el anavos ha el viu, che la casa era tut schellada e las duas strias cun ella.

116. La stria, che mava a cavagl sin l' uolp.

In pur de Faltscharidas ha viu mont sper il pegn de Rodund sut Lunpegna ora ina femna cun in barlac tschietschen e verd ed in schierl si dies, che mava a cavagl sin ina uolp d' in pegn si.

117. Il barlutt si Russein.

In umm de Villa haveva la biestga si Russein. Ina sera eis el jus a vitg. Turnont anavos ha el udiu, co ins saltava e sunava en siu nuegl. Pleins tema ha el udiu ina vusch, che hag detg: „Sch' il patrun dil nuegl vul vegnir en ed ira treis cun mei, sun jeu fetg contenza.“ Sinquei ha il perveseder fatg la sontga crusch e tut ei stau quiet.

118. La stria si Schlans.

A Schlans carteva tut mal sin ina veglia. Aber per franc saveva negin, sch' eis fuss ina stria ne buc. En ina societat ha in giuven detg, el vegli schon saver far ina emprova cun la veglia e far seglir quella ord da fanestra, sch' ella seigi ina stria. Ses camerads levan buca crer quei ed el ha schau vegnir sin l' emprova. Il mat ha cargau ina pippa tubac e mess en rena benedida dils treis sogns retgs denter en. El ei jus en casa della veglia, ei semess encunter gl' esch et ha fimau tubac. Ualti gleiti entscheiva la veglia a vegnir malruaseivla e di al giuven, el hagi ussa propi in schliet tubac, ella possi buca vertir quei fem. Il giuven ha aber fimau vinavont ed ei buca se muontaus navent digl esch. Vesent la veglia, ch' ella saveva buca mitschar zanua auter, seglia ella si, arva la fenestra e cun in¹ sgregn se bett' ella della fenestra ora. Da leu denvi han ins saviu, co ei steva cun la veglia.

1. ed. iu