 |
Questa pagina è ancora da trascrivere o è incompleta. | |
| 644 | Märchen |
Suenter in viadi per liungas vias ei la giuvna vegnida en in stgir uaul. Cheu era ei in eremit, che manava veta sontga. Quel ha la buoba dumendau, sch' el savessi era dar novas de siu frar. Igl eremit ha respondiu, quei sappi el buc; mo el hagi in etg en ina scatla, cun quel deigi ella ira tier il morder grond. Quel hagi in affon, il qual seigi schon dapli biars onns en letg malseuns. Mo entras igl etg en la scatla sappi ella medegar igl affon e lu vegni il morder a far nuot dil mal ad ella. Lez sappi forsa dar novas de siu frar.
La matta ha continuau siu viadi ed ei arrivada tier ina hetta. En quella era negin auter ch' ina dunna, che steva sper il letg d' in affon malsaun. La dunna ha fatg beinvegni alla matta, mo bein spert detg: „Va po naven bein dabot, mia buna giuvna, pertgiei ti eis gartiada en la casa d' in grond morder. Quel ei grad jus en igl uaul per in buordi lenna. Mo sche el tuorna ed anfla tei cheu, lu fa el flucs cun tei.“ La matta ha detg, ella lessi aunc bugient medegar quei pauper affon malsaun avon ch' ira. Ella pren ora igl etg e strusch ha ella giu tuccau en 'gl affon cun quel, sch' ei igl affon levaus si e curius entuorn. La mumma fuva tut ord seseza della legria ed ella ha commondau al figl d' ira encunter al bab e de rugar quel, de far bien cun la matta, che hagi medegau el. Cura ch' il morder grond ha viu siu affon sauns e frestgs, ha el se smervegliau zun fetg e dumendau, tgi hagi medegau el. Il buob ha raquintau, co ei seigi ju e mess vitier: „Neve bab, ti fas bien cun la matta?“ Cura ch' il morder grond ei vegnius a casa, ha la matta emprau el, sch' el sappi buca, schei seigi in affon giu 'gl uffiern. Il morder ha respondiu, el mondi mintga di giu 'gl uffiern, leu seigi in affon, sch' ella vegli mirar quel, deigi ella mo suondar el. En in hoi ein els omisdus stai avon las portas digl uffiern. Sin lur spluntar compara in terribel matgiert giavel. La mattatscha ha domondau quei giavel, sch' ei seigi buc in affon en igl uffiern. Il demuni rispunda: „Bein, cheu eis ei in affon, mo quel survegnas ti buc“ e lu ha el dau in1 sbatt agl esch. Els han spluntau la secunda gada e lu eis ei vegniu neutier aunc in bia pli matgiert giavel. Mo era quel ha dau in sbatt agl esch, schi gleiti sco els ha domondau suenter igl affon. Spluntont la tiarza gada ha in giavel, ch' era aunc bia pli macorts ch' ils dus auters, aviert la porta. Quel ha la mattatscha dumendau, tgiei ins stuessi far, per spindrar quei affont ord igl uffiern. „Quel survegns ti mo cun menar siat onns veta sontga, senza plidar in solet plaid.“
Il morder grond, che haveva se fatg nonveseivels, ha commondau alla mattatscha, de dumendar il giavel, sch' ei seigi era speronza, ch' il morder grond possi vegnir salvs. Sin quei ha il giavel mussau in sgarscheivel fuorn de fiuc ed ha detg: „Quel ei semptgaus per il morder grond.“
- ↑ ed. iu
