Pagina:Decurtins - Rätoromanische chrestomathie, I.djvu/763

734 Giachen Caspar Muoth

El batta las vias e sterna galèra,
El fiera semenzas e plonta pommèra.
95 Tscharieschas selvatgas, spinatschs de melaischa
Cattav' el avunda sper plontas de daischa.
Correger selai la natira mendusa,
La cura dell' olma fuss pli fadigiusa.
Il Sogn meditescha, gigina ed ura,
100 Il pader ruaussa, selegra, lavura.
E tut che pruescha, che catscha, che crescha,
Che sia cultira dil meglier florescha.
Pertut ei ruaus e beada letezzia,
Perfin ils glimaris han pers lur malezzia;
105 Ch' in uors ina sera compara, semetta
Cun cots e gaglinas avon la casetta,
Ch' el létga dil pader la criua manutta
E tuorna puspei egl uaul alla trutta.
Savent gl' eremit ca guder las gaglinas
110 Havent la baselgia las sontgas giginas.
Ha 'lg uors per mussar ch' el capeschi cureisma
Portau in cavriel silla festa Tschuncheisma.
La grippa quietta, la bostga deserta
Da giaps e trombettas ein oz en alerta.
115 Tras caglias e streglias, per crest e vallatscha
Cun tgeuns e fumeglia scadeina la catscha.
L' utschleglia sezuppa, glimaris burleschan,
Ils tgeuns e catschaders siglientan e greschan
Il Sogn meditescha sper sia capella
120 E tut demaneivel ei schon la canella.
In' ursa blessada, terribel glimari
Compara, tahegia sil prau solitari.
Cun giaps ed aviras, furtinas e queida
Suondan catschaders e tgeuns en rueida.
125 Mo l' ursa vitier la caplutta serenda
E sper la schanuglia dil pader sestenda,
E fitga l' egliada sil Sogn cun fidonza
D' haver in refugi ha certa speronza.
Ils umens surstattan, stupeschan, admiran,
130 Ils tgauns secaveglian giun plaun e deliran.
De far in' attacca negin che ughegia
Sin l' ursa, ch' il Sogn cun miraclas protegia.
E l' ursa sesaulza litgont la manutta,
E tuorna puspei egl uaul alla trutta.
135 „Danunder has ti o carstgaun! la pussonza“,