 |
Questa pagina è stata trascritta ma deve essere formattata o controllata. | |
718 Giachen Caspar Muoth
In curteseivel salit de quellas babellas amablas
Renda ê grazia al giuven per quellas dueivlas manieras. —
„Beinvegnentas matteuns e veglias tuttas ensemen!“
35 Clom' il vegliurd: „E vegni, nus lein semetter a meisa!“ —
Mo nagina vul leu de far empau la maltschecca.
Sesa gie la cumar dil tat la vieua Cecilia
Gia daditg sil sessel. Matteuns ein adina schanadas
Mo il Toni dentont prendeva la prusa Rosina
40 E plazava giudem el plaz della mumma de casa.
Fuva Rosina gia la spusa dil cau en baselgia,
Dunna per cugl' advent haveva fatg plaz agli Scheiver.
Ussa haveva la feglia dil Gion la bella Margretta
Era la curascha de seser osum il pez dina supia.
45 Era la Tina fagieva ca fei ded ir ella falla,
Cu Cunigunda haveva ugiau de seser spel Toni. —
Cheu envida il tat: „Matteuns mo bucca schenadas!“
Brav buei e maglei, stueis oz esser cuntentas
Mo cun pauc“ — „O na cumpar gliei cheu detgiavunda!“
50 Scheva sinsu la cumar el sessel, la vieua Cecilia,
Tuttas fuvan d' accord: „Ai gie gliei cheu detgiavunda!“
Strusch tuccavan ils dens las stupentas scadiolas miola,
Peun e caschiel circulav' en bellas talgias satellas —
Mo las fagievan ca not, sche gie che tut envidava.
55 Tgi vul far il maltschec? — Sulet la prusa Rosina
Schava derscher en duas, perquei che siu Toni voleva,
Fuva la brava gie la mesa mumma de casa.
Ussa las spatlas sutbratsch menava Toni las femnas
Giu el nuegl spazius per oz lur laboratori. —
60 Quel terlischa scuaus per tutt schubergiaus dellas teilas,
Che tertognan schiglioc las preits e la peleunca misclada.
Bein figienta calira dil muvel en stalla vischina,
Or d' in diember barcuns fladescha tras la ferdaglia.
Cun graziusa spertezza comparan las bellas en stalla.
65 Volvan la schuba suren e mettan en urden las spatlas,
Ligian in brav fazalet entuorn il meun e la schlappa
Sco schurmetg dellas tschuffas, mordentas restas schuengia,
Lu cun tutt alla fin camonda la vieua Cecilia:
— Quella haveva dil tat survegniu il niebel imperi.
70 Ella seseva perquei a miez silla pun principala. —
„Toni, breuncas neutier e canastras pintgas e grondas!
Nus volein luvrar, entscheiver zacu e lu ventscher.“
Toni scarsav' il mantun, fertont che l' activa fintschalla
Spert cureva neutier cun canastras pintgas e grondas.
