 |
Questa pagina è stata trascritta, formattata e riletta. | |
| — 59 — |
Ma se torna el seren, se come dis el poèta
L’aria l’e lustra che la par de ras...
come se ved di vœult in di matinn d’april e de magg, Jesus, che legrìa per quî cent gugliètt de zuccher che spongen l’aria, pizz in punta del primm só ch’el ghè fa i galitt! La legrìa de pizz, de frastaj, de scalett, de lumaghitt, de ghirigori, de pivión che fann l’amor in man delle sante vergini de sass, o in spalla ai patriarca che da trii secol guarden giò, che se parlassen!... El só el pizza i foghetti anca in di veder coloraa; el fa nass di fior ross, giald, verd, violett sui pilaster, per terra, su i altar; sona l’orghen, e cinquanta fiœu, pover rattitt senza pà, canten gloria in excelsis, con certi vôs bianc, che vann in alt fina a fa on bœucc in del paradis.
