Lo cannaruto, ommo de bona vita;
L’adulatore, bravo cortesciano,
Che canosce l’omore
De lo patrone, e che le vace a bierzo;
La pottana, cortese e de buon tratto;
Lo gnorante, ch’è semprece e da bene1.
Cossì, de mano mano,
Va descorrenno, e suffecit!
Perzò n’è maraveglia s’a la corte2
Lo tristo pampaneja
Lo buono se gualeja,
Perchè so li signure
Gabbate da sta tenta a li colure,
E fanno cagno e scagno,
Comme sempre s’è visto,
Lassanno l’ommo buono pe lo tristo!
Mar. Negrecato chi serve!
O che meglio la mamma
L’avesse fatto muorto:
Corre borrasca, e mai no spera puorto!
Col. La corte è fatta sulo
Pe gente viziosa,
Che ne tene lo buono sempre arrasso,
E lo leva de pede, e botta e sbauza.
Ma, lassammo sti cunte,
Ca mentre me se raspa3 a dove prode,
No scomparria4 pe craje, nè pe pescrigno5!
Perzò, facimmo punto, e nsoperammo,
Mo che lo sole joqua a covalera6,
Che farrimmo lo riesto n’autra sera!
- ↑ (EO) da abene.
- ↑ (EO) corra.
- ↑ Gratta.
- ↑ Finirei,
- ↑ Domani, nè doman l’altro.
- ↑ V. n. 8, p. 172.