Che n’adora, nè fete,
No spurceto, no nsipeto,
Rusteco, cotecone,
N’ommo senza sapore, e senz’ammore,
Sciaurato, bestiale,
Catarchio, maccarone senza sale!
Mar. O felice chi stace a no desierto,
Ca non vede, nè abbotta;
Dica chi vole, io trovo
No mutto assai provato:
Meglio sulo, che male accompagnato.
Col. Ma, pò, dall’autra banna.
Trova no commerzevole.
Che se fa carne ed ogna co l’ammice:
No buon compagno affabele,
Che tratta a la carlona;
E, co sta tenta, chi lo crederria?.
Trova chi lo retaglia, e forfecheja1,
Cose e scose, e lavora a pilo mierzo,
E le face la causa da dereto;
Chiammannolo sfrontato, miette nante,
Pideto mbraca2, fronte a pontarulo,
Strenga rotta ndozzana3,
Sfacciato, petrosino d’ogne sauza,
Che vo mettere sale a quanto vede,
Che vo dare de naso a quanto sente,
Ntrammettiero, arrogante, mpacciariello;
Auzate chesso, e spienne, poveriello4!
Mar. Nce vole chesto e peo;