Votta buono le mescole,
Ave armo de leone,
S’accide co la morte1,
Nè dà maje passo arreto, e sempre meste
Comm’a no caperrone.
Ma, s’è misso a sta tenta,
È tenuto da tutte
Pe no scapizzacuollo mpertenente,
Temerario, nsolente,
No toccuso2, no pazzo, vetrejuolo.
No tentillo, no fuoco scasa-case.
Che te mette lo pede ad ogne preta,
Che te cerca l’arrisse3 co lo spruoccolo,
N’ommo senza ragione,
Una perzona rotta e senza vriglia,
Che non è juorno, che non fa scarriglia4;
Che fa stare nquiete li vecine.
Che provoca le prete de la via;
Nsomma, è stimato n’ommo, che vedimmo
Degno de rimme, degno de no rimmo5
Mar. Zitto, ch’hanno ragione.
Perchè perzona sapia ed aggiustata
È chi se fa stimare senza spata.
Col. Ecco nc’ è no spizeca,
Uno muorto de famme.
Uno stritto ncentura,
Una vorza picosa6, una tenaglia
De caudararo, cacasicco e stiteco,
Uno roseca-chiuove,
