Posata, ommo da bene,
Che vace co lo chiummo e lo compasso,
Nè piglia strunze mbuolo1,
Nè a dènare contante
Compra le costiune;
Non eje esca de corte,
Se fa lo fatto sujo,
È quieto e cagliato2;
De sta manera, o figlio,
È tenuto pe vorpe no coniglio!
Mar. Me pare, che la ntenne
Chi se sarva la pelle,
Ca na vota lejette
A na storia, non saccio
Si fatta a mano, a stampa:
Ch’un bel fuir tutta la vita scampa3!
Col. Ma, po, dall’autra parte,
Vide n’ommo de punto.
Un ommo arresecato, ommo de core,
Che non cede mollica a Rodomonte,
Che sta da toccia a toccia4 co n’Orlanno,
Che sta da tuzzo a tuzzo co n’Attorre,
Che non se fa passare
La mosca pe lo naso, ed ha li fatte
Nante, che le parole,
Che fa stare a stichetto, e fa che metta
Dui piede into na scarpa
Ogne taglia cantone e capo parte;