Pagina:Basile - Lu cunto de li cunti, Vol.I.djvu/448

234 lo cunto de li cunti

E, commenzanno a berzagliare chella pignata nnocente, a le tre o quattro pantosche1, lo prencepe, nzertanno a pilo, ne fece la festa. Jonze la vecchia a tiempo, che s’erano partute, e, trovato st’ammaro desastro, commenzaje a fare cose mardette, gridanno: «Di che se stira lo vraccio, e che se ne vaga vantanno, lo caperrone de Foggia2, ch’ave tozzato co ssa pignata!, lo figlio de vava, c’ha rotta la fossa de le carne soje!, lo villano cotecone, c’ha semmenato contra stagione li fasule mieje! E puro, si non ave avuto na stizza de compassione de le miserie meje, doveva avere quarche respetto a lo nteresse propio, e non jettare pe terra l’arme de la casata soja, nè fare ire pe li piede le cose, che se teneno ncoppa la capo3! Ma va, che preo lo cielo a denocchie scoperte, e co le visciole de lo core, che se pozza nnammorare de la figlia de quarche orca, che lo faccia vollere e male cocere; la sogra nce ne dia tanta pe lo cegne4, che se vea vivo e se chiagna muorto, e che, trovandose mpastorato e da le bellezze de la figlia, e da li percante de la mamma, non se ne pozza cogliere maje le bertole5, ma stia, anche ne crepa, soggetto a li strazio de chella brutta arpia; la quale l’aggia da commannare li servizie a bacchetta, le dia lo pane co la valestra, tanto, che, chiù de quatto vote, venga a sosperare li fasule, che m’ha jettato!» Mesero lo mardezziune de sta vecchia l’ascelle6, che sagliettero subeto ncielo; tanto, che, se be se sole dicere pe proverbio: «jastemme de femmena pe culo te le semmena», ed «a cavallo jastemmato luce lo pilo», tutta vota, deze a lo naso de lo prencepe, che nce appo a las-



  1. Zolle: qui, colpi di pietra.
  2. V. n. 27, p. 109.
  3. Allude al proverbio, che cita più oltre: «Chi semmena fasule, le nasceno corna».
  4. Per le cinte, percuotere: tormentare.
  5. Far le bisacce, e partire.
  6. Miser le ali.