Pagina:Basile - Lu cunto de li cunti, Vol.I.djvu/441


jornata ii. trattenimiento vi. 227

jeze a corcare; e, chiamanno la zita a portare lo quatierno pe saudare li cunte amoruse, essa, puostose lo spruoccolo mocca, pigliaje la figura de n’urzo terribele, e le jeze ncontra. Lo quale, atterruto de sta maraveglia, s’arravogliaje drinto a li matarazze, da dove manco pe la matina cacciaje la catarozzola. Tratanto, Preziosa se ne scette fora, e toccaje a la vota de no vosco, dove facevano monopolio l’ombre comme potessero a le 24 ore fare quarche aggravio1 a lo sole. Dove se stette co la doce converzazione dell’autre animale, ficchè venne a caccia a chille paise lo figlio de lo re de Acquacorrente. Lo quale, vedenno sforza, appo a morire ciesso2; ma, adonatose ca st’animale, tutto coccioliannose3, e menanno la coda comm’a cacciottella4, le jeva ntuorno, pigliaje armo. E, facennole carizze, decennole: «Cucce cucce, misce misce, ti ti, rucche rucche, cicco palù, ense ense5!», se lo portaje a la casa, ordenanno che lo covernassero comme la perzona propia, facennola mettere drinto a no giardino a canto lo palazzo riale, pe poterela vedere, sempre che voleva, da na fenestra. Ora, essenno sciute tutte le gente de la casa, e restato sulo lo prencepe, s’affacciaje pe vedere l’orza. E vedde che Preziosa, pe covernarese li capille, levatose lo spruoccolo da la vocca, se pettenava le trezze d’oro. Pe la quale cosa vedenno sta bellezza fore de li fore, appe a strasecolare de lo stopore. E, derropatose pe le scale, corze a lo giardino. Ma Preziosa, addonatase de l’agguaito, se schiaffaje lo spruoccolo mocca, e tornaje comm’era. Lo prencepe, sciso a bascio, e non trovanno chello, che aveva visto da coppa, restaje cossì ammisso pe lo corrivo, che, puostose a na granne malanconia, nquatto juorne scapezzaje malato, de-



  1. Offesa.
  2. Morir di colpo, all’improvviso.
  3. Accucciolarsi, farsi carezzevole.
  4. Cagnolina.
  5. Voci, da chiamare e attirare varie sorti d’animali.