Pagina:Basile - Lu cunto de li cunti, Vol.I.djvu/437

jornata ii. trattenimiento vi.

223

nose la varva, ne ncacava le stelle, che l’avevano mannato sta desgrazia! Ma, perchè voze fare comm’a chillo: «Doglia do guveto e de mogliere¹, assaje dole, e poco tene»: «doje, una a la fossa, e n’autra a la cossa².», non era ancora sciuta la notte a la chiazza d’arme de lo cielo a pigliare mostra de li sportegliune³, quanno accommenzaje a fare li cunte co le deta: «Ecco morta moglierema pe mene, ed io resto vidolo e negrecato, senza autra speranza de vedere⁴’ si no sta negra figlia, che m’ha lassato! Perzò, sarrà necessario procurare de trovare cosa a proposito pe farence no figlio mascolo. Ma dove dongo de pizzo?, dove ashio na femmena spiccicata⁵ a le bellezze de moglierema, si ogni autra pare na scerpia a fronte ad essa? Ora lloco te voglio! Dove ne truove n’autra co lo spruoccolo⁶, dove ne cirche n’autra co lo campaniello, si natura fece Nardella (che sia ngrolia!), e, po, roppe la stampa? Ohimè!, a che laberinto m’ha puosto, a che fiscole⁷ la prommessa, che l’aggio fatta! Ma che? Io ancora non aggio visto lo lupo, e fujo: cercammo, vedimmo, e ntennimmo! È possibele, che non ce vole essere autr’asena a la stalla de Nardella?, è possibele, che voglia essere perduto lo munno pe mene?, nce sarrà fuorze la scajenza⁸, la sporchia⁹ de le femmene?, se ne sarrà perduta la semmenta?» Cossi dicenno, fa subeto jettare no banno e commannamiento da parte de mastro Jommiento¹⁰, che tutte le femmene belle de lo munno ve-

---

1. Dolor di gomito e di perdita di moglie.
2. Una nella tomba e l’altra nel letto.
3. A far la rivista dei pipistrelli.
4. Forse deve correggersi: arede.
5. Tal quale, bella come mia moglie.
6. A cercarla col fuscello.
7. Gabbie: che s’adoprano nello strettoio per l’olio. A che strette.
8. Mancanza, scarsezza.
9. qui nel senso di: mancanza.
10. V, n. 10, p. 173.