 |
Questa pagina è stata trascritta, formattata e riletta. | |
| jornata ii. trattenimiento v. | 213 |
non me fa deventare sto palazzo tutto d’oro». E Cola Matteo, referuto st’autro capriccio de lo re a lo serpe, lo serpe le disse: «Va, e piglia no fascio d’erve deverze, e ugnene le pedamente de lo palazzo, ca vedarrimmo de contentare sta regnola1». Cola Matteo, a lo stisso punto, se fece na grossa mappata de foglia molle, de rapestelle, d’aitille, de porchiacche, d’arucole e de cerefuoglie2; e, fattone n’onzione a lo pede de lo palazzo, se vedde subeto tutto stralucere comme a pinolo naurato3, da fare vacuare le povertà a ciento case, stetecute4 da la fortuna. E, tornato lo foretano a nomme de lo serpe a fare stanzia pe la mogliere, lo re, vedennose stagliate li passe, chiammaje la figlia, e le disse: «Grannonia mia, io, pe delleggiare no marito, che te voleva, aggio cercato patte, che me pareva mpossibele, che se potessero comprire. Ma, vedennome arrivato ed obrecato, non saccio comme, te prego, si sì figlia benedetta, che me facce mantenere la fede, e che te contiente de chello,che vole lo cielo, ed io so costritto de fare!» «Fa chello, che te piace, tata gnore mio, — respose Grannonia — , ca no sciaraggio na jota da lo volere tujo». Ntiso chesto, lo re disse a Cola Matteo, che facesse venire lo serpe. Lo quale, sentuto la chiammata, ncoppa a no carro tutto d’oro, tirato da quatto lefante d’oro, se ne venne a la corte. Ma, dovonca passava, sfrattavano atterrute le gente, vedenno no serpe accossì gruosso e spaventuso fare lo spassiggio pe la cetate. Ed, arrivato mpalazzo, tremmaro comme a junco, ed ammarciaro tutte li cortesciane, che non ce restairo manco li guattare. E lo re, e la regina se ncaforchiaro pe lo jajo drinto a na cammara; sulo Grannonia stette sauda sauda! E, benchè
