 |
Questa pagina è stata trascritta, formattata e riletta. | |
| 210 | lo cunto de li cunti |
Sempre se dette l’ascia a lo pede chi cercaje troppo coriuso de sapere li fatte d’autro, comme ne pò fare testemonio lo re de Starzalonga, che, pe mettere lo musso a la chelleta, sgarraje lo filato de la figlia, e roinaje lo nigro jennero, che, dove era venuto a sfracassare co la capo, restaje co la capo sfracassata.
Ora dice, ch’era na vota na foretana, che desiderava chiù d’avere no figlio, che non desidera lo liticante la sottenza nfavore, lo malato l’acqua fresca, e lo tavernaro la passata de lo percaccio1. Ma, pe quanto lo marito zappava a jornata, mai arrevava a vedere la ferteletate, che desederava. Ma, essenno juto no juorno lo poverommo a fare na fascina a la montagna, e sciaravogliannola2 a la casa, nce trovaje no bello serpetiello drinto a le frasche. La quale cosa vedenno Sapatella (chè cossì se chiammava la foretana), jettato no gran sospiro, disse: «Ecco ca pe fi a li sierpe fanno li serpunchiole, e io nasciette sbentorata a sto munno, co no guallaruso3 de marito, che con tutto che sia ortolano, non è da tanto de fare no nzierto4!» A le quale parole rispose lo serpe: «Pocca non puoje avere figlie, e tu pigliate a me, ca sarrà no buono appiello5, e te vorraggio bene chiù de mamma». Sapatella, che ntese parlare a no serpo, appe a spiretare; ma, fatto armo, le disse: «Quanno mai ped autro, pe ssa amorevolezza toja io me contento d’azzettarete comme si fusse sciuto da lo denucchio mio». E cossì, consignatole no pertuso de la casa pe connola, le deva a magnare de chello, che aveva, co la chiù granne affezzione de lo munno. E, crescenno de juorno njuorno, comme fu fatto granneciello, disse a Cola Matteo, lo foretano, che teneva pe messere: «O tata, io me voglio nzorare!» «De grazia, — disse Cola Matteo — , trovarrimmo n’au-
