Pagina:Basile - Lu cunto de li cunti, Vol.I.djvu/420

206 lo cunto de li cunti

stajeco lo re, descrevenno lo valore, lo nciegno, lo jodizio de Cagliuso, e, sopra tutto, la recchezza granne, che se trovava pe le campagne de Romma e de Lommardia: pe la quale cosa, meretava d’apparentare co no re de corona. E, demannanno lo re, che se poteva trovare, respose la gatta: ca non se poteva tenere cunto de li mobele, stabele e soppellettole de sto riccone, che non sapeva chello che aveva; e, si lo re se ne volesse nformare, avesse mannate gente cod isso fore lo regno, ca l’averia fatto canoscere a la prova, ca non c’era recchezza a lo munno comme la soja. Lo re, chiammato certe fedate suoje, le commannaje, che se fossero nformate menutamente de sto fatto; li quale jettero pe le pedate de la gatta. La quale, co scusa de farele trovare refrisco pe la strata de passo npasso, comme fu sciuta li confine de lo regno, correva nante, e quante morre de pecore, mantre de vacche, razze de cavalle e vranche de puorce trovava, deceva a li pasture e guardiane: «Olà, state ncellevriello, ca na mano de vannite1 vonno sacchiare quanto se trova a sta campagna; però, si volite scappare sta furia, e che sia portato respetto a le cose vostre, decite, ca so robbe de lo segnore Cagliuso, ca non ve sarrà toccato no pilo!» Lo simile deceva pe le massarie, che trovava pe lo cammino; tale che, dovonca arrivavano la gente de lo re, trovavano na zampogna accordata, che tutte le cose, che scontravano, l’era ditto, ch’erano de lo segnore Cagliuso. Tanto, ch’essenno stracque d’addemmannare chiù, so ne tornaro a lo re, decenno mare e munte de la recchezza de lo segnore Cagliuso. La quale cosa sentenno lo re, promese no buono veveraggio a la gatta, si trattava sto matremmonio. E la gatta, fatto la navettola2 da ccà o da llà, all’ute-



  1. Banditi.
  2. Spola di tessitore. Cfr. Cortese (Micco Pass., VIII, 22). Int.; tergiversato un pezzo.