«Una cosa sarria schitto bona a sarvare le la vita; ma non me lo fare dicere, ch’è cosa, die mporta!» «Dimmello, sannuto mio, — leprecaje l’orca — ; dimmello, non me vighe morta!» E l’uerco: «Io te lo dirraggio, puro che me mprommiette de non confidarelo a perzona vevente: perchè sarria la scasazione1 de la casa nostra e la ruina de la vita». «Non dubetare, marituoccolo bello bello, — respose l’orca — ; perchè chiù priesto se vederranno li puorce co le corna, le scigne co le code2, le tarpe coll’uocchie, che me ne scappa mai na parola da vocca!» E, joratone co na mano ncoppa all’autra, l’uerco le disse: «Ora sacce ca no è cosa sotta lo cielo, e ncoppa la terra, che potesse sarvare lo prencepe da li tammare3 de la morte, fore che lo grasso nuestro; co lo quale ontannose le chiaghe, se farria no sequestro a chell’arma, che vo sfrattare da la casa de lo cuorpo sujo». Nella, che sentette sso chiajeto, dette tiempo a lo tiempo, che scompessero de ciancoliare. E, scesa dall’arvolo, facenno buon’armo, tozzolaje la porta dell’uerco, gridanno: «Deh, signure mieje orchisseme, na carità, na lemmosena, no signo de compassione, no poco de meserecordia a na povera meschina, tapina, che, zarafinata4 da la fortuna, lontano da la patria, spogliata d’ogni ajuto umano, l’è cogliuto notte a sti vuosche, e se more de famme!» E tuppete tuppete! — L’orca, che sentette sto frusciamiento de chiocche, le voze tirare meza panella, e mannarennella. Ma l’uerco, ch’era chiù cannaruto de carne de cristiano, che non è la lecora de la noce5, l’urzo de lo mèle, la gatta
- ↑ Rovina, disgrazia.
- ↑ V. n. 88, pp. 28-29.
- ↑ Birri: v. n. 33, p. 83
- ↑ (ES) tarrafinato. — Subissata, rovinata.
- ↑ Lecora, lucherino. V, a questo propos., il grazioso racconto di Popa in Cortese, Micco Pass., III, 19 sgg.
