|
jornata i. la coppella. |
169 |
E se va1 spobrecanno pe no pazzo;
Pe retrovare la materia prima,
Perde la propria forma;
Crede moltiprecare
L’oro, e desmenuisce chello, ch’ave;
Se magena sanare
Li metalle malate,
Ed isso se ne corre a lo spetale;
E, ncagno de quagliare
L’argiento vivo, azzò se spenna e vaglia,
La stessa vita, faticanno, squaglia.
E, mentre trasmotare
Se pensa nnoro fino ogne metallo,
Se trasmuta da n’ommo no cavallo!
Fab. Senza dubbio è pazzia
A pigliare sta mpresa: io n’aggio visto
Ciento case scasate, e poste nfunno!
Nullo ne luce maje,
Ma, pe granne speranza desperato,
Ne va sempre affommato, ed affammato!.
Jac. Ma dimme; vuonne chiù pe tre caalle?
Fab. Io stongo canna aperta pe scortare.
Jac. Ed io me ne jarria per fi a la rosa!
Fab. Secuta puro mo, che stai de vena!
Jac. Si, quanno l’arma non me stesse mpizzo,
Pocca passata è l’ora de lo mazzeco!
Perzò, sfilammonnella,
E viene, si te piace,
A la poteca mia,
Ca menarrimmo nsiemme li morfiente2:
Non manca tozze a casa de pezziente!
- ↑ (EO) se ne va.
- ↑ Denti; e propr., gl’incisivi e i canini.