Pagina:Basile - Lu cunto de li cunti, Vol.I.djvu/369

jornata i. la coppella.

155

          O afferra a secozzune,
          O piglia a barvazzale o a sciacquadiente,
          Mascune, mano merze, ntunamente,
          Chechere, scoppolune, scarcacoppole,
          Annicchie, scervecchiune,
          Cauce, serrapoteche e ntommacune,
          E le mette na foca o pollecara¹.
          Vasta, ca piglia punte, e leva taglie;
          Fa la voce de l’ommo,
          La corzeta de crapio;
          Semmena spetezzate,
          Recoglie molegnane²;
          E, quanno tu te cride,
          Ca vo mestire³, comme a caparrone,
          Che dia masto a n’asserzeto⁴
          E che votte le mescole;
          Scoppa dì, fa buon juorno,
          Te resce no cavallo de retuorno!,
          Affuffa, alliccia, assarpa ed appalorcia,
          Sporchia, sfratta, e se coglie le viole,
          E squaglia, e sfila, e sparafonna, e spara
          Lo tiro de partenza,
          Se la dace ntallune, e sbigua, e scorre;
          Se ne piglia le vertole;
          Ajutame tallone, ca te cauzo!,
          Le carcagna le toccano le spalle.
          Ed ha lo pede a leparo, e te joca
          Lo spatone a doi gamme;
          E, comme a gran potrone,
          Arranca, e fuje; receve, e va mpresone!

---

1. Modi di stringer la gola colle mani. Per la sinonimia napoletana degli schiaffi e altre percosse, cfr. Partenio Tosco (o. c., pp. 255-7).
2. Lividure.
3. Investire, cozzare.
4. Mandi in rovina un esercito. Cfr. MN., III, ecc.