Pagina:Basile - Lu cunto de li cunti, Vol.I.djvu/336

LA VECCHIA SCORTECATA

---

Trattenemiento decemo de la Jornata primma.

Lo re de Roccaforte se nnammora de la voce de na vecchia. E, gabbato da no dito rezocato¹ la fa dormire cod isso. Ma, addonatose de le rechieppe², la fa iettare pe na fenestra. E, restanno appesa a n’arvolo, è fatata da sette fate, e, deventata na bellissema giovane, lo re se la piglia pe mogliere. Ma l’autra sore, nmediosa de la fortuna soja, pe farese bella, se fa scortecare, e more.

No nce fu perzona a chi n’avesse piaciuto lo cunto de Ciommetella, ed appero no gusto a doi sole, vedenno liberato Canneloro e casticato l’uerco, che faceva tanto streverio de li povere cacciature. E, ntimato l’ordene a Iacova, che sejellasse co l’arme soje sta lettera de trattenemiento, essa cossì trascorze.

Lo marditto vizio, ncrastato co nui autre femmene, de parere belle, nce reduce a termene tale, che, pe nnaurare la cornice de la fronte, guastano lo quatro de la faccie; pe janchejare le pellecchie de la carne, roinano l’ossa de li diente; e, pe dare luce a li membre, copreno d’ombre la vista, che, nanze l’ora de dare tributo a lo tiempo, l’apparecchiano scazzimme³ all’uocchie, crespe a la facce e defietto a le mole. Ma, se merita biasemo na giovanella, che, troppo vana, se dace a sse vacantarie ⁴,

---

1. Succhiato.
2. Grinze.
3. Cispe.
4. Vanità.