 |
Questa pagina è stata trascritta, formattata e riletta. | |
| 100 | lo cunto de li cunti |
stato Cienzo, lo patrone, credennose che fosse lo frate, le fece li maggiore carizze de lo munno; e po, volenno darele denare, isso non ne voze. E, vedennose fare tante ceremonie, cadette npensiero, che llà fosse stato lo frate; e, perzò, pigliaje speranza de trovarelo. Comme la luna, nemica de li poete, votaje le spalle a lo sole, se mese ncammino. Ed, arrivato dov’era la fata, la quale, credennose che fosse Cienzo, le fece na mano d’accoglienze, sempre decenno: «Singhe lo benvenuto, giovane mio, che me sarvaste la vita!», Meo, rengraziannola de tanta amorosanza, disse: «Perdoname, s’io non me trattengo, ch’aggio pressa. A revederece a la tornata!» E, rallegrannose fra se stisso, ca sempre trovava pedate de lo fratiello, secotaje la strata; tanto, ch’arrivaje a lo palazzo de lo re, la matina a punto che Cienzo era stato sequestrato da li capille de la fata. E, trasuto drinto, fu recevuto da li serviture co granne onore; ed, abbracciato da la zita con granne affezzione, le disse: «Ben venga la mia mogliere!» «La matina va, la sera vene! Quanno ogne auciello a pascere, lo luccaro1 ammasona! Comme sì stato tanto, Cienzo mio?, comme puoje stare lontano da Menechella? Tu m’hai levato da vocca a lo dragone, e me schiaffe ncanna a lo sospetto, mentre non me fai sempre schiecco de st’uocchie tuoje 2!» Meo, ch’era no trincato3 penzaje subeto, fra se stisso, ca chessa era la mogliere de lo frate; e, votatose a Menechella, se scusaje de la tardanza, ed, abbracciatola, jettero a mazzecare. Ma, quanno la luna, comm’a voccola, chiamma le stelle a pizzolare le rosate, jezero a dormire; e Meo, che
