 |
Questa pagina è stata trascritta, formattata e riletta. | |
| 96 | lo cunto de li cunti |
diente, auzaje no cuorpo cossi spotestato, che le tagliaje ntruonco tutte sette le capo, che se ne sautaro da lo cuollo, comm’a cecero da la cocchiara. A le quale levato le lengue, e stipatoselle, le sbelanzaje no miglio da rasso da lo cuorpo, azzò non se fossero n’autravota ncrastate nsiemme. E, pigliatose na vrancata de chell’erva, ch’aveva ncollato lo cuollo co la capo de lo dragone, mannaje Menechella a la casa de lo patre, ed isso se jette a reposare a na taverna. Quanno lo re vedde la figlia, non se pò credere la prejezza, che ne fece. E, sentuto lo muodo, comm’era stata liberata, fece jettare subeto no banno: che chi avesse accise lo dragone, venesse a pigliarese la figlia pe mogliere. Sentuto chesto no villano maliziuso, pigliatose le teste de lo dragone, jette a lo re e le disse: «Pe sto fusto è sarva Menechella!; ste manzolle hanno liberata sta terra da tanta roina! Ecco le teste, che so testimonio de lo valore mio! Perzò, ogne promessa è debeto!» Lo re, sentenno chesto, se levaje la corona da capo, e la pose ncoppa la catarozzola de lo villano: che parette capo de forasciuto ncoppa a na colonna1. Corze la nova de sto fatto pe tutta la terra, tanto, che venne all’aurecchie de Cienzo. Lo quale disse fra se medesemo: «Io veramente so no gran catarchio! Appe la fortuna pe li capille, e me la lassaje scappare da mano! Chillo me vo dare miezo lo tresoro, ed io ne faccio chillo cunto, che fa lo Todisco de l’acqua fresca2.
- ↑ Giustiziato, o altrimenti ucciso, un brigante, un bandito, se ne soleva esporre la testa sopra una colonna, o dentro una gabbia, spesso con mitera o corona di carta in testa.
- ↑ È nota la fama d’ubbriaconi, goduta dai Tedeschi: i quali, un tempo, si può dire non erano conosciuti per altro presso di noi. Cfr. Liebr. (Anm., I, 401-2). Al tempo del N.: «I Thedeschi, così superbi, altieri, Servon la patria mia per panettieri O per alabardieri»,dice il Del Tufo (ms. c., f. 203).
