 |
Questa pagina è stata trascritta, formattata e riletta. | |
PERUONTO
Trattenemiento terzo de la Jornata primma.
Peruonto, sciaurato de copella, va pe fare na sarcena1 a lo vosco, usa no termene d’amorevolezza a tre che dormeno a lo sole, ne receve la fatazione, e, burlato da la figlia de lo re, le manna la mardezzione, che sia prena d’isso, la qual cosa successe. E, saputose essere isso lo patre de la creatura, lo re lo mette dinto na votte co la mogliere e co li figlie, jettannolo dintro mare. Ma, pe vertute de la fatazione soja, se libera da lo pericolo, e, fatto no bello giovene, deventa re.
Mostraro tutte d’avere sentuto no gusto granne pe la consolazione avuta da lo povero prencepe e pe lo castico recevuto da chella marvasa femmena. Ma, avenno da secotejare lo parlamiento Meneca, se deze fine a lo vervesiamiento2 de l’autre, ed essa commenzaje a contare lo socciesso, che secota.
Non se perdette maje lo fare bene: chi semmena cortesie, mete beneficio, e chi chianta amorevolezze, recoglie amorosanze; lo piacere, che se fa ad anemo grato, non fu maje sterele, ma ncrina gratetudene e figlia premmie; se ne vedeno sprementate ne li continue fatte dell’uommene, e ne vedarrite esempio ne lo cunto, c’aggio mpizzo de fareve sentire.
