Pagina:Basile - Lu cunto de li cunti, Vol.I.djvu/256

42

jornata i. trattenemiento ii.

a la quale era attaccato lo campaniello. Lo quale toccato a pena, sonaje; e la fata, credennose che fosse lo prencepe, scette subeto fora. Ma le perchie scalorcie¹, comme vedettero sta pentata cosa, le mesero le granfe adduosso, decenno: «Tu si chella che tiri a lo molino tujo l’acqua de le speranze nostre?, tu si chella che ci hai guadagnato pe mano lo bello riesto de la grazia de lo prencepe?, tu si chella magnifeca, che te sì posta mpossessione delle carnecelle nostre?; singhe la ben venuta, va, ca sì arrevata a lo colature!, oh che non t’avesse cacato mammata!, va ca staje lesta!, aje pigliato vajano²!, nce si ntorzata³ sta vota!, non sia nata de nove mise, se tu ne la vaje!» Cossì decenno, le schiafattero na saglioccola⁴’" ncapo, e, spartennola subeto nciento piezze, ogn’una se ne pigliaje la parte soja: sulo la chiù peccerella non voze concorrere a sta crudeletate cosa, e, mmitata da le sore a fare comme facevano lloro, non voze antro, che no cierro de chille capille d’oro. Fatto chesto, se l’appalorciaro pe la medesema cava. Arrivaje, fra tanto, lo cammariero pe fare lo lietto ed adacquare la testa, secunno l’ordene de lo patrone, e trovato sto bello desastro, appe a morire spantecato! E pigliatose le mano a diente, auzaje li residie⁵ de la carne e de l’ossa avanzate, e, raso lo sango da terra, ne fece tutto no montonciello dinto la stessa testa; la quale adacquata, fece lo lietto, serraje, e posta la chiave sotto la porta⁶, se ne pigliaje le scarpune fora de chella terra.

---

1. Brutte, vili. Cfr.MN, II.
2. Hai trovato il tuo danno. «Detto usitatissimo per dinotare che la cosa non succederà secondo l’altrui desiderio» (Fasano, o. c., II, 71).
3. Capitata.
4. Mazza.
5. Resti, rimasugli.
6. Cfr. II, 10. Nota il Liebr.: «Anche nelle nostre classi popolari, è cosa non rara il metter la chiave sotto la porta altrove, nel partire, perchè altri poi ve la ritrovi.» (Anm., I, 399). Ed è usuale anche presso il nostro popolo.