 |
Questa pagina è stata trascritta, formattata e riletta. | |
| 32 | lo cunto de li cunti |
tura, lo fece buono abbottare1 de menestra e vedere lo funno de l’arciulo; e, comme l’ebbe scapizzato ncoppa a no letticiello, se ne corze a pigliare la mazza, e, chiammanno la mogliere a sta bella festa, disse: Auzate, mazza! La quale commenzaje a trovare la stiva de li tavernare, e tuffete da cca, e tiffette da llà, le fece na juta e na venuta de truono, tale che, vedennose curte e male parate, corzero, sempre ca lo chiajeto 2 dereto, a scetare Antuono, cercanno mesericordia. Lo quale, vistose la cosa colare a chiummo3, e lo maccarone dinto a lo caso4, e li vruoccole dinto lo lardo, disse: «No c’è remmedio; vuje morarrite crepate de mazze, si no me tornate le cose meje!» Lo tavernaro, ch’era buono ntommacato5, gridaje: «Pigliate quant’aggio, e levame sto frusciamiento de spalle!»; e, pe chiù assecurare la parte d’Antuono, fece venire tutto chello, che l’aveva zeppolejato6; che, comme l’appe dintro ale mano, disse: Corcate, mazza! e chella s’accosciaje e jettaje da na parte. E, pigliatose lo sommarro, e l’autre cose, se ne jeze a la casa de la mamma; dove, fatto cemiento rejale de lo tafanario de l’aseno, e prova secura de lo tovagliulo, se mese buone cuoccole7 sotto, e, maritanno le sore, e facenno ricca la mamma, fece vero lo mutto:
A pazze e a peccerille Dio l’ajuta.
- ↑ Gonfiare.
- ↑ Prop.: lite, affare
- ↑ Riuscire.
- ↑ Ora si dice: il cacio sui maccheroni. Il Brano, nello Spaccio della bestia trionf. (D. III): «Ne è cascato, com’è proverbio in Napoli, il maccarone dentro il formaggio». Per altri prov. e frasi prese dai maccheroni, cfr. III, 9; IV, 3, 4, 6, 9.
- ↑ Battuto ben bene.
- ↑ Rapito di soppiatto, arraffato.
- ↑ Quattrini.
